[A:229]bral ba'i nges shes skye ba ma gtogs/ ji ltar yin nam snyam pa'i blo sbram theng nge sdod pa ni mi srid pa nyams su myong bas gzhan du lo zlar bsgoms pa bas dam pa 'di'i gsung thos pa tsam yang don che bar mthong bas/ skal ba dang ldan pa'i zhal slob rnams legs par bsams shing thugs dgyes par mdzad do/ /'on kyang 'khor ba thog ma med pa nas log rtog 'ba' zhig la rgyud sbyangs pa'i skal ngan dag la ni ji ltar yod ci cha/ smras pa/ dkar gsal yid du 'ong ba'i ri bong can/ /rab dngas padma'i mtsho la gsal bar 'char/ /rnyog ldan ba tshwa'i rdzing bur de lta min/ /kye ma dngos po'i rten 'brel ches ngo mtshar/ /bye brag tu'ang dpal ldan sa skya pa'i zab don gyi nying khu gsung ngag rin po che lam 'bras bu dang bcas pa'i gdams pa/ dmar po skor gsum/ dmar mo skor gsum/ mgon po gur zhal sogs kyi gdams pa zab mo rnams/ bla ma gong ma rnams kyis chos la gces spras dang dam dog shin tu che ba'i sgo nas/ slob ma tshogs par gyur pa phal cher la de dag gi lam gyis 'gros sbam me ba tsam gnang / thun mong ma yin pa'i snyan brgyud kyi zab gnad med du mi rung ba rnams slob ma'i gtso bo re re tsam la chig brgyud la sogs par gnang ba las deng sang dus kyi dbang gis de dag kyang je nyung la song nas chad pa la nye ba na/ ji ltar tsu ta'i gling gi mi dag gis skyes bu rkang gnyis pa rnams mi ma yin zhes smod pa dang mtshungs par thun mong gi sgros 'dzin pa'i blo chung rnams kyis thun mong ma yin pa'i gdams