[A:228] de la rgya bod du bshad srol mi 'dra ba dang / de dag gi bzhed srol so so 'di ltar bzhed/ bla ma brgyud pa rnams kyis nyams bzhes mdzad pas ngo mtshar gyi ltas byung ba'i lo rgyus 'di ltar yod/ spyir 'di la yig sna 'di tsam mchis/ da lta lag len ngag 'don yi ge 'di dang 'di'i thog nas byed/ bla ma'i zhal las byung ba'i khyad par gyi zhal shes 'di lta bu zhig yod gsung ba sogs/ dpyod ldan rnams kyi blo'i yul du 'di kho nas don thams cad 'grub pa 'dug snyam pas bla ma dang lha dang gdams ngag la dus de nyid du mi phyed pa'i dad pa thob pa zhig 'ong ngo / /de bzhin du dbang bskur mdzad pa rnams kyang dkyil chog gi ngag 'don bshar sbyang gi lung nyan tsam ma yin par/ gdan gsum tshang zhing yongs dag bzhi'i sgo nas dag bya dag byed mtha' dag legs par zhib tu ngo sprad cing / lhag par ye shes chen po'i ting nge 'dzin gyi rgyud byin gyis brlabs pas lus ngag yid gsum la nyams kyi 'gyur ba mnan gyis mi thub pa dang / dbang de grol ba dang / da lan nga'i rgyud la sngags kyi sdom pa rnam par dag pa nges par skyes byung snyam pa'i nges pa'i shes pa gting tshugs pa byung / 'khrid sogs gnang ba'i tshe'ang gsung gi gdangs thos pa tsam gyis tha mal gyi rtog pa rags pa rnams nyal gyis 'gro/ dmigs pa'i mtshams mtshams su 'di ltar byed ces rje nyid kyang lta stangs dang bcas pa'i sgo nas cung zad re mnyam par gzhog par mdzad pa na/ dus de nyid du ji skad gsung pa bzhin rgyud la skyes byung snyam pa dang / de ga las ma 'das pa thag chod 'dug snyam pa the tshom dang