[A:229]'di nyid kyi drin/ /rje btsun mkhas pa mkhas btsun rje/ /grub par grags khyod grags par grub/ /mgon med skyabs mchog skyabs med mgon/ /dran mchog bla ma bla mchog dran/ /de ltar sbyin dang snyan par smra ba la sogs pas mtshams sbyar nas mthar zab pa dang / rgya che ba'i dam pa'i chos kyis 'gro ba rnams smin cing grol bar mdzad pa yin te/ gong du cung zad smos pa ltar 'phags yul nas lam yongs su rdzogs pa'i srol chen po bdun tsam las 'ongs pa'i yongs 'dzin dam pa rnams kyi zhal gyi bdud rtsi'i rgyun dri ma med pa/ rje nyid thugs mtshor 'khyil ba las byung ba'i/ dbang lung / 'khrid/ bshad pa/ man ngag /lag len/ zhal gdams/ yig sna/ zab gnad/ bka' rgya can gyi rigs la sogs pa'i zab cing rgya che ba'i chu klung bye ba phrag mang po nyin re bzhin 'bad med du babs pas/ gdul bya so so rang rang gi khams dang bsam pa bag la nyal gyi rim pa dang mthun par dkri bar mdzad pa yin no/ /de dag la'ang sla chos dang / rigs 'gre rung mthun sbyor ba/ rang bzo la sogs pa'i dri ma mtha' dag dang bral ba/ de rang gi skabs su bab pa'i spyi dang khyad par gyi 'chad par 'os pa rnams/ cung zad kyang ma lus pa/ ma lhag pa/ ma nor ba/ ma 'chol ba/ ma gab par gsung / gsal zhing go bde la dal brel snyoms pa/ 'brel chags shing gdangs snyan pa'i sgo nas lhug par 'doms par mdzad pa yin la/ mtha' na rjes gnang ngam/ bzlas lung chung ngu zhig gnang na'ang / de'i rtsa ba'i khungs kyi yi ge 'di yin/