[A:219]'dzin ma'i tha gru 'bebs/ /khyod zhabs dregs ldan gtsug na gus mchod kyang / /brtse chen thugs rjes dman rnams lhag par skyong / /de ltar rje btsun chos kyi rgya mtsho la/ /ring nas 'dus pa'i skal bzang de dag ni/ /kun kyang dge ba'i bya bas dus 'da' ba'i/ /rmad byung spyod pa'i rnam thar 'di ltar snang / /phal cher dam pa'i ded dpon bka' drin gyis/ /dal 'byor gru gzengs tshogs gnyis rlung dar g.yo/ /'jigs rung 'khor ba'i mtsho las brgal byas te/ /rnam grol yid bzhin gling du chas par gyur/ /yongs dag zab gsal gnyis med ting 'dzin las/ /byung ba'i rten dang brten pa'i dkyil 'khor ni/ /dbang po'i gzhu ltar shar ba'i snang brnyan gyis/ /ma dag snang ba ming gi lhag mar byas/ /kha cig bse ru lta bur gnas bcas te/ /rang sems nam mkha'i pha mtha' 'tshol ba na/ /btsal ba'i rnyed min bltas pas ma mthong bar/ /brjod bral lhan skyes ngang du zim mer gnas/ /'ga' dag ljon pa'i tshal gyi spre'u ltar/ /rmi lam sgyu ma'i rol rtsed sna tshogs kyis/ /bden 'dzin 'khrul pa'i nags kyi rang mtshang rig /zung 'jug dpag bsam rtse la mchong ba snyam/ /mkhas pa ngang pa'i ded dpon de dag ni/ /lung rigs mgrin pa'i rdza rnga cher sgrog cing / /bla gos gshog yangs mkha' la rab 'phyar nas/ /chos grwa'i pad mtsho ci yang mdzes par byas/ /snod ldan skal bzang gtsug phud ldan pa dag /khyod zhal char sprin gzhon nur mngon phyogs te/ /snyan brgyud sprin sgra gsang chen chu char gyis/ /tshim pa'i gar sgyur ting 'dzin sgro gur 'bubs/ /'ga' dag blo ldan bram ze ji bzhin du/ /rig sngags zab mo'i bzlas brjod lhur blangs pas/ /rtags