[A:218]phyag gis byugs/ byin rlabs/ dmigs pa/ rlung sbyor/ 'khrul 'khor sogs gang 'os lhug par gnang / zas gos sman nad g.yog sogs mthun rkyen gang dgos sbyar nas brtse ba'i gsung gis dbugs 'byin par mdzad do/ /tshogs kyi bdag po'i dngos grub rba rlabs ni/ /gyen du 'phyur ba'i kun bzang mchod sprin gyis/ /dpal ldan bla ma rgyal ba rgya mtsho'i tshogs/ /mi 'gyur bde chen dbyings su mnyes par mdzad/ /gsang chen zab mo'i 'khor lo rnam gsum gyis/ /nyin mtshan 'da' ba'i grub rig 'dzin pa brgya/ /yang dag 'dod dgu'i dpal la spyod bzhin du/ /nyams rtogs rdo rje'i glu dbyangs sgrog par gyur/ /nyam thag tsha bas gdung ba'i mgon med rnams/ /khyod zhal padma'i do rar lta byed cing / /rang rang mkho dgu'i phun tshogs bye ba brgyas/ /sems kyi ngal gso thob 'di e ma mtshar/ /kye ma sngon dus ri bo nag po ni/ /bya rog sgra gcan zhes bya'i sman ljongs su/ /rlabs chen bya dka'i spyod pas rnam rol ba/ /rgyal ba'i sras po snying stobs chen po can/ /sbyin la dga' zhes grags pa'i gzhon nu de/ /ngur smrig bla gos gsar pa gyon bzhin du/ /gangs can sa yi thig le 'dir 'ongs nas/ /slar yang gtong ba'i sgo brgya phye ba snyam/ /nyi zer gzhon nu'i li khri'i me tog phreng / /sngo bsangs mdzes ma'i bzhin la rab 'thor kyang / /sa 'dir chu skyes dga' ba'i ze'u 'bru la/ /yid 'phrog sbrang rtsi'i bcud kyis gtams par byed/ /char sprin mthon po'i mkha' la sgra sgrog kyang / /bdud rtsi'i zil char