[A:215]mkhas btsun smyon par grags pas zhig gsos mdzad pa/ dus kyi dbang gis cung zad nyen pa na/ rje nyid kyis 'di 'jig nges na nga yod pa'i bar la zhig na legs pas bshig par zhu sogs chos skyong nyid la bka' bsgos te spyan gzigs sogs gzhan du spos pa na/ ring por mi thog par 'phral du rang zhig tu gyur/ slar rje nyid kyis zhal bkod mdzad de sngar las kyang ches cher ngo mtshar ba/ spen bad/ gdugs phreng / rgyal mtshan/ thug dar lcog dang bcas pa skye bo kun gyi mig gi bdud rtsir gyur pa zhig myur bar gegs med du grub par mdzad/ mdor na sgrub spyil so so/ rngaud khang chu thags sogs dge 'dun rnams la nye bar mkho dgu cog thams cad ma tshang ba med pa phun sum tshogs par bsgrubs/ der bzhugs kyi sgrub pa ba/ phyi mtshan nyid theg pa'i sgro 'dogs mtha' dag chod de/ nang rdo rje theg pa'i nges don zab mo'i bgo skal don du gnyer ba la byon pa'i bshes gnyen dam pa rnams kyis gtso mdzad/ mdor na tshe 'di'i bya ba thams cad bzhi mdo'i rtswa ltar rgyab tu bor nas mya ngan las 'das pa'i go 'phang rtse gcig tu sems shing / rje nyid kyi snyan grags kyis rang dbang med par sems phrogs te/ ring nas 'dus pa dam tshig dang sdom pa rnam par dag pas rgyud bsdams nas thun bzhi'i rnal 'byor lhur len zhing / snyan brgyud zab mo'i dpal la 'dod dgur spyod pa brgya phrag las mi nyung bar bzhugs pa rnams la rgyun gyi gsol phogs phun sum tshogs pa lhag chal chil 'ong ba/ zla ba ngo re bzhin tshes bzhi'i