[A:216]mchod pa'i mang ja shin tu bzang ba/ cho 'phrul chen po'i dus chen la/ bdag chen rdo rje 'chang chen po'i dgongs pa rdzogs phyir/ rje nyid gtso bor phebs te der bzhugs thams cad kyis/ bcom ldan 'das snying po kye rdo rje man ngag lugs kyi dkyil 'khor sgrub mchod rdul tshon la brten pa zla ba phyed tsam sogs mdzad/ zhabs tog kyang mang ja nyung ja grangs mang ba tshogs kyi 'khor lo phun sum tshogs shing gya nom pa/ gzhan yang der bzhugs kyi gtso bor gyur pa rnams la dus rgyun pa'i gsol ja sogs kyi bsnyen bkur/ de 'og rnams la'ang tshar rting ma'i gsol ja rtag par gnang / byings la'ang 'phral 'phral bskor ba'i gsol ja thun mong du'ang skabs skabs su dus nges med kyi mang ja gdan non 'phral 'phral du 'ong ba dang / dar 'gyed ras 'gyed sogs phyag tu gang byung de 'phral du gnang / dbyar gzhug gi tshe spang kha sogs sa phyogs yid du 'ong bar dpon slob thams cad phebs nas bza' ba dang bca' ba dang btung ba'i bye brag bzang zhing gya nom pa'i dbyar mthong gi rnam pa phun sum tshogs pa'ang gnang / lhag par khams kyi 'bul sdud 'khor nas lo 'ga'i bar gdan sa chen po dpal ldan sa skyar tshogs pa gang 'dug la lo re'i nang du mang ja bzang po bco brgyad re/ bsngo rten phun sum tshogs pa dang bcas pa/ rje btsun gong ma rnams dang / rje nyid kyi rtsa ba'i bla ma dam pa rnams kyi thugs dgongs rdzogs phyir bsgrubs/ der rjes lo mang dag gi bar tshes bzhi mchod pa'i mang ja ma chad pa/ dus phyis kyang skabs skabs su dngos po lhag ma gang 'dug 'phral du ser gsog tu gnang / tha na na bza' 'theb kyang mi bzhes/