[A:213] ji ltar 'khor los sgyur ba'i rgyal po la rgyal srid rin po che sna bdun rang grub tu 'byung ba ltar 'bad pa med pa phyag tu babs/ de mthun seng ge rtse nas kyang gcen lung nas lo re bzhin stong ra ma'i 'bul ba/ skabs skabs su 'bru brgya 'bul la sogs pa phun sum tshogs pa'i zhabs tog bdag rkyen mdzad/ de rjes mnga' ris pa 'bul dpon chos skyong grags pas rje nyid kyi bka' drin rjes su dran pas nye bar mkho dgu'i zhabs tog la dmigs nas khams phyogs su 'bul sdud la 'gro ba'i rgyu mtshan nan gyis phul bas bka' yis gnang ste/ byon pas rin po che'i dngos po stobs rab tu che ba byung ba rnams rjes su 'bul dpon rdo rje rgyal po bas do dam byas nas/ ja zi bol ser nag gos dar/ mdzo drel sogs dad can rnams kyis phul ba'i 'bul sdud/ dus der dngos gtsang zhing gnangs che ba'i thag chod pa kun gyi blor mi shong ba tsam gegs med du sleb/ seng ge rtse bas kyang slar stag thog bkra shis 'dzom/ lha sbug /mang mkhar gnas gsar la sogs pa'i chos gzhis bogs yod gtos che ba'i dge rgyun phul/ gzhan yang gzhis ka rin spungs/ byang ngam ring / rgyal mkhar rtse/ mnga' ris glo bo sogs kyi sde dpon/ dpon skya dad can ji snyed pas 'bru dang / rin po che sogs kyi 'bul ba zhabs tog rgyun dang glo bur ba ji snyed dbyar gyi char sprin ltar 'du ba yin no/ /de ltar dpal tshogs kyi bdag po'i dngos grub kyi rba rlabs gyen du 'phyur ba las byung ba'i yang dag pa'i longs spyod kyi dngos po nam mkha'