[A:211]snod ldan gyi bu slob rnams kyis kyang rtse gcig tu gsol ba btab kyang zhal gyis ma bzhes pa'i tshe/ chu bo chen po la gru gzings gyen du btang ba la phebs pa sogs dge ba'i mtshan ltas mang po shar/ sngar gyi bdag chen rdo rje 'chang chen po'i gsung rnams kyang rjes su dran pas slar zhal gyis bzhes te/ gangs ri'i khrod kyi mkhas pa dang grub pa yongs kyi gtsug na mngon par mtho ba gnyan lo tsA ba chen po dar ma grags dang / gnam kha'u pa dar ma rgyal mtshan nas bzung ste rje btsun sa skya pa yab sras khu dbon rim pas rnam par grol ba'i go 'phang brnyes pa'i grub gnas dam pa dpa' bo mkha' 'gro ngang gis 'du zhing / dam can rgya mtsho sprin ltar 'thibs pa/ grub rig 'dzin pa bye ba'i bsti gnas/ lhag par dpal mgon chen po gdong bzhi pa 'khor bcas mngon sum du gnas nas mchog dang thun mong gi dngos grub thams cad bde blag tu ster ba'i pho brang / mthong ba tsam gyis yid 'phrog cing ting nge 'dzin khyad par can ngang gis skye ba/ thos pas kyang don dang ldan pa dpal gnam kha'u'i brag rdzong gi chos kyi mngon par mtho ba'i seng ge'i khri la zhabs kyi padma bkod de kha ba can gyi rig sngags 'chang ba yongs kyi gtsug gi nor bu la bka'i springs yig ngal gso bar gyur to/ /mkhas mang kun da'i rtse la gar byed cing / /grub mchog mgrin sngon ral par ngal gso ba'i/ /khyod zhabs chu shel dkar po'i 'od ris can/ /lung rtogs rlung gi shing rta la zhon nas/ /yab rje bla ma'i gdung