[A:209] mthar ni thams cad la sangs rgyas dngos kyi 'du shes bzhag nas mi phyed pa'i dad pa rtse gcig tu bsgom par mdzad cing / skye bo gzhan dag gis de dag gi khrod nas 'ga' zhig la gnas tshul la snyad pa'i skur ba cung zad 'debs pa na'ang / bshad sbyangs kyi sgo nas bzlog pa'am rang nyid gzhan du 'byon pa'am/ de lta bu ma bde na'ang thugs dam gyi ngang du mnyam par bzhag nas snyan dbang tsam du'ang mi gsan par mdzad pa yin no/ /bsams na shes pa'i mngon par shes pa'ang thogs med du mnga' ba yin te/ seng ge rtse ba'i bdag mo rdo rje bu khrid pas sku cha brtag pa zhig mdzad dgos zhus pas de 'dra mi dgos khyed tsho sngar sras po yin zer ba 'di bu mo yin/ da lta sku lus la yod pa 'di bur skye ba'i khag theg gsungs pas de kho na bzhin du byung ba dang / yang lan cig seng ge rtse nas smad phyogs la 'byon khar bdag mo la da lo khyed rang gi sku chas gang 'dug rim gro la ma btang na dog cha shin tu che ba 'dug pas cis kyang thugs rtsol mdzad pa zhu gsungs/ de mthun sde pa dpon blon la'ang bdag mo la sku chas gang 'dug sku rim la thong zhus yod pas de'i mthun rkyen mi mdzad par kha 'gegs mdzad na bdag mo dang 'bral thag chod gda'o gsung ba gnang kyang / sku chags kyi dbang gis le lor lus pas de lo bdag mo gshegs rje 'di phebs gdong du sde pa dpon g.yog rnams shin tu gnong bas mjal mi nus pa lta bu byung / dus phyis kyi dbus gtsang gi bde gzar chen po 'di 'go rtsom pa'i dus/ gnyug la ba'i zhu ngo la 'phros nas gzhis ka rin spungs su sde pa ngag dbang rnam rgyal dpon blon la/ rje 'dis snyan 'debs mang po phul/ de bzhin ma mdzad na mkha' reg man la spyan gzigs rgyu mi yong thag chod gsungs pas/ thugs la shin tu mi 'phrod pa la rjes su de kho na ltar byung bas