[A:175]shas tsam brjod na/ thog mar bka' drin che ba'i bla ma rnam pa gsum la dam pa'i chos kyi bka' drin nos pa'i tshul ni/ rgyal ba rdo rje 'chang chen po kun dga' bzang po nyid kyi drung du/ bcom ldan 'das dpal kye rdo rje man ngag lugs lha dgu'i dkyil 'khor du rgyu dus kyi dbang bskur ba tshar gcig /tshe dpag med dze tA ri'i lugs kyi lha dgu'i dbang / grub pa'i rgyal mo'i lugs lha gcig bum gcig gi tshe dbang / phyag na rdo rje u tsarya'i rjes gnang / sgrol dkar yid bzhin 'khor lo'i rjes gnang / gur gyi mgon po lcam dral lha gsum gyi rjes gnang rnams tshang 'ga' gsan par mdzad do/ /de bzhin du rigs thams cad kyi bdag po/ dkyil 'khor thams cad kyi gtso bo/ dpal ldan sa skya pa'i zab don snyan brgyud thams cad kyi bang mdzod/ kha ba can gyi rdo rje 'dzin pa kun gyi ded dpon/ mthu stobs kyi dbang phyug bdag chen rdo rje 'chang chen po blo gros rgyal mtshan dpal bzang po zhes mtshan yongs su grags pa de nyid la lus ngag yid gsum cig car du phul/ mnyes pa gsum gyis mnyes par mdzad nas/ zab don man ngag thams cad kyi bka' babs pa'i tshul ni/ rje btsun rdo rje 'chang chen po de nyid kyi thugs rje'i lcags kyus drangs shing / mkha' 'gro chos skyong rnams kyi 'phrin las kyis bskul ba'i stobs kyis/ gra thang du rab byung mdzad 'phral dpon slob gnyis ri khrod cig tu sku mtshams shin tu dam par bzhugs pa'i dus/ nub mang po'i bar mnal lam gyi gsal snang du mi nag dang khyi nag g.yag nag sogs mang po 'ongs te/ khyod sa skya la rgyug mi 'gro na brdung ba yin gsod pa yin zer ba dang / res 'ga' khyed mi 'gro na 'di ltar byed zer khong rnams kyis sku chas