[A:174]'dun grangs tshang ba'i dbus su bsnyen par rdzogs pa'i sdom pa tshul bzhin du bzhes nas sangs rgyas kyi bstan pa la zhugs la yongs su rdzogs par gyur to/ /dus de nyid nas bzung ste bslab pa'i gnas phra zhing phra ba'i bar thams cad mig gi 'bras bu ltar gces par bsrung ba dang bcas pa'i mtshams las cung zad kyang 'da' ba'i go skabs mi mnga'/ lhag par lo grangs mang po'i bar du sdor dkar kho na dus thams cad du gdan gcig pa'i brtul zhugs la gnas par mdzad la/ tshul khrims kyi dri bzang po'i ngad ldang bas gang du bzhugs pa'i gzims khang khyab cing / drung na 'khod pa dag kyang khams dngas shing yid 'phrog pa ni mngon sum gyis grub pa'o/ /rnam dag khrims kyi ma la ya yi spo/ /bag yod ha ri tsan dan rgyas pa'i nags/ /yid 'phrog ga pur gsar pa'i ngad ldang ba/ /sngon med tshal 'di bstan pa'i dpal du grub/ /e ma khyod sku'i ma pham mtsho/ /bla gos sin dhu gsar pa yis/ /bgos pa'i li khri'i mdangs 'od kyis/ /thun 'tshams sprin la co 'dri byas/ /de tshe dgra bcom nye bar 'khor/ /skyengs pas zhi ba'i zol gyis bzhud/ /yang na paN chen yon tan 'od/ /byang gi phyogs 'dir zhugs sam ci/ /gzhan yang bdag nyid chen po 'dis yongs 'dzin dam pa rnams kyi drung du zab pa dang rgya che ba'i thos bsam gyis thugs rgyud sbyangs te shes bya'i gnas rnams la ma rtogs pa dang log par rtog pa dang the tshom gyi dri ma mtha' dag dang bral bar mdzad pa yin te/ de'i tshul cha