[A:172]bzung ste btsun pa byed ran gsungs then then pa 'ga' mdzad byung bas/ mnal sad nas kyang dbu skra tsha zeng nge ba byung / de ma thag rgyal srid kyi dpal 'byor phun sum tshogs pa thams cad mchil ma'i thal ba ltar ltos med du dor nas sbrul gyi shun pa brjes pa bzhin rang nyid bka' bzhin lhur len pa'i 'khor gcig gnyis dang bcas pa chos grwa chen po gra thang gi gtsug lag khang du byon/ rje btsun dam pa mtshungs med shes rab zla ba'i spyan sngar dgung lo so bdun pa sna tshogs dbyig ces bya ba'i lo la rab tu byung bar mdzad de/ mtshan kun bzang chos kyi nyi ma blo ldan shes rab kun dga' rgyal mtshan dpal bzang po zhes bya bar gsol ba yin no/ /'jigs rung ngam nag za ba'i ri sul gyi/ /sbrul gdug mchil mas sbags pa'i tshang tshing bzhin/ /nyes brgya'i 'byung gnas khyim gyi phun tshogs la/ /rmi lam tsam du'ang chags pa'i skabs med par/ /sngon tshe sngon nas 'brel ba'i 'dren pa des/ /yang dang yang du gsung gis bskul ba ltar/ /rab dmar rab mdzes bla gos du ku las/ /yid 'phrog yid kyi 'dzin ma khebs par gyur/ /de nas bsnyen par rdzogs pa'i sdom pa bzhes tshul ni/ snga gong du 'gro ba'i bla ma bdag chen rdo rje 'chang chen po blo gros rgyal mtshan dpal bzang po'i snyan grags kyis thugs yid phrogs te gsung chos kyi 'brel pa zhu ba dang / zhar la dpal ldan sa skya mjal zhing sman grong rdo rje pa nang so mtsho skyes pa'i bla sman du 'bod pa sogs la phebs te/ bdag chen rdo rje 'chang chen po dang legs par mjal gsung chos kyi bka' drin kyang ci rigs gsan/