[A:171]ya na yi/ /yid 'ong lag 'gro pho mo mkha' la spyod/ /rdo rje theg pa'i glegs bam bye ba brgya/ /khyod nyid gcig pus bdag gir mdzad pa snyam/ /de dag la 'di skad ces bya ste/ byang phyogs kha bas bskor ba'i sman ljongs su/ /rigs rus cho 'brang ldan par sku 'khrungs nas/ /rdo rje 'chang dbang rje btsun bla ma dang / /sprul pa'i rgyal pos lung bstan rjes su bzung / /khyim pa'i gzugs kyis 'dul ba'i 'gro ba rnams/ /bskyang phyir khyod kyis 'khor los sgyur ba yis/ /tshul gyis rgyal srid bzung ba'i rnam thar lags/ /gnyis pa rgyal srid tshul bzhin du bskyangs pa'i mthar rgyal ba'i bstan pa la rab tu byung nas rgya chen thos bsam gyi sgro 'dogs bcad pa'i tshul ni/ gong du smos pa ltar snga mo nas rab tu byung ba'i thugs 'dun shin tu che bar yod pa dang / lhag par 'khor ba mtha' dag sdug bsngal gyi rang bzhin me 'obs lta bur gzigs shing / de las sgrol ba'i thabs kyi gtso bo'ang lhag pa'i tshul khrims kyi bslab pa nyid du dgongs/ bstan pa 'dzin pa'i skyes bu rnams kyi khrod na'ang ngur smrig rgyal mtshan 'chang ba nyid rab dang phul du byung bar mkhyen nas ring por ma thogs par rab tu byung bar bzhed pa'i tshe/ nub gcig gi dus mnal dang 'od gsal 'dres pa'i gsal gnang du e waM chos ldan gyi bla brang nang du phebs/ rgyal tshab dam pa kun dga' dbang phyug pa dang mjal/ rdo rje 'chang chen po gang na bzhugs zhus pas g.yabs chen na bzhugs gsung / der rje 'dis phebs byin rlabs zhus pas dbu skra nas