[A:164]shar ri'i phrag par nyi gzhon mthon pa ltar/ /DA ki'i mkha' las yid 'ong gzhon nu'i sku/ /'gro 'di'i bsod nams gzugs can bzhin du bltams/ /de nas mkhas grub bla ma yis/ /de yi phung khams skye mched la/ /gdan gsum tshang ba'i sa bon btab/ /rdo rje 'dzin pa'i ded dpon du/ /dang po'i dbang gis smin par byas/ /de dus skye rgu rkang drug ldan pa rnams/ /yid 'phrog de yi gzugs kyi chu skyes la/ /blta zhing 'dod dgu sbrang rtsis tshims pa yis/ /snyan pa'i dar dir phyogs brgyar sgrog la brtson/ /de la ya mtshan 'chi med skyed tshal nas/ /yid srubs lha yi me tog gsar pa'i phreng / /kai la sha yi rdul dkar 'khrigs pa bzhin/ /gzhon nu bzhugs pa'i sa phyogs kun tu 'thor/ /e ma zla shel lhun po'i spo/ /utpal sngon po'i mig dkyus dang / /sbrang rtsi 'dzin pa'i ral khur gyis/ /brgyan na 'di dang mtshungs pa snyams/ /de ltar gzhon nu de ni mdzes shing lta na sdug pa rang bzhin gyi mtshan dpe'i cha shas dang ldan pas skye bo kun gyi mig gi bdud rtsi lta bur gyur cing / sngon legs par spyad pa'i spyod pa rlabs po che la ring nas goms pa'i shugs kyis tho co'i spyod pa cung zad kyang mi mdzad cing / dul zhing yid gzhungs pa dang / sku rtsed kyi rnam pa'ang chos 'chad pa dang / dbang bskur ba dang / sbyin pa gtong ba la sogs pa dge ba'i bya ba bsgrub pa'i tshul gyis dus 'da' ba dang / lan cig gi tshe rdo ring gi grog po zhig gi nang du bros nas yib bzhugs pa las/ kun gyis btsal bas rnyed nas yum