[A:163]pa dang / snang ba mtha' dag 'od gsal du 'char ba sogs ting nge 'dzin gyi sgo du ma thugs rgyud la 'khrungs so/ /rgyal dbang rnam sprul 'chi med gzhon nu zhig /smon lam dag pa'i 'od gsal lha lam nas/ /rgyal rigs mthon po'i nor 'dzin rtser babs te/ /mtshan ldan dga' ma'i gzhal med khang du zhugs/ /de tshe yum gyi sku ni shing bal ltar/ /yangs shing zla dbang lta bur dkar mdangs chags/ /dga' bde'i ting 'dzin bdud rtsis myos pa yis/ /sgyu 'phrul lha mo'i ngang tshul ji bzhin gyur/ /de nas yab zhe gnyis pa/ yum so gnyis pa dkar po zhes bya ba sa mo sbrul gyi lo nag pa zla ba'i yar ngo'i tshes bcu bzhi skar ma khra la bab pa'i dus sbyor bzang po'i nyi dros la sku bltams par gyur to/ /de'i tshe nam mkha' g.ya' yongs su dag cing nyi zla'i 'od zer ches cher gsal ba dang / nye 'khor thams cad du lha'i me tog gi char chen po babs par gyur cing / /de la skye bo dag gang gi ltas yin nam gleng ba na phal cher deng sang rdo ring pa la sras khyad par can zhig 'khrungs yod 'dug pas de'i ltas yin par nges so zhes mthun snang grub par byed la/ der 'dus pa'i skye bo'i tshogs la btsas ston phun sum tshogs pas rab tu tshim par mdzad cing / yab kyis bsod nams lhun po rin cen du mtshan gsol 'khrungs ma thag rje nyid kyi mes po'i zhang po zha lu pa'i slob brgyud mkhas grub rgyal mtshan dpal bzang la gshin rje gshed dmar po'i dkyil 'khor du smin byed dbang bskur ba gsan par mdzad do/ /chu mtsho'i 'jing nas zla shel gsar pa dang / /