[A:616]la bsam gtan phug tu sku mtshams shin tu dam par mdzad/ sbrul lo shar ma thag tu bde ldan ri khrod du gsung ngag la sogs pa'i gdams pa zab mo rnams btsugs nas chos 'phro rnams rdzogs pa'i tshe/ rigs ldan padma dkar po'i sprul pa ta'i si tu rnam rgyal grags pa dpal bzang po yab sras dang / ngam rings chos sde'i bstan 'dzin gyi skyes bu rnams kyis 'bad pa chen pos gdan drangs te/ chos sder phebs nas/ bdag po yab sras la dbang bskur rnam par dag pa dang / chos sde'i dge bshes rnams la gsung ngag la sogs pa'i dam pa'i chos kyi char chen po phab ste/ rnam grol gyi lo thog ma skyes pa rnams bskyed pa dang / skyes pa spel bar mdzad pa yin no/ /slar yang de'i ston e waM chos ldan du phebs nas/ phyogs kyi dge ba'i bshes gnyen stong phrag tsam 'dus pa la/ gsung ngag la sogs pa'i gdams pa zab mo bstan/ yo byad kyi dngos po phyag tu byung ba rnams la/ la la ni gser gyi gan ji ra bsgrubs te/ gtsug lag khang gi steng du btsugs/ 'ga' zhig ni gtsug lag khang du mchod rdzas kyi rgyu ru bzhag /gzhan dag ni/ che 'go rnams la gnang sbyin dang / dge 'dun spyi la bsnyen bkur mdzad/ don lnga pa rta lo'i dpyid mus su phebs nas/ bde ldan ri khrod du dad ldan rnams la gdams pa zab mos tshim par mdzad/ de'i dgun po slar yang byang yon mchod rnams kyis gdan drangs nas dpal ngam rings su phebs te/ zab pa dang rgya che ba'i chos kyi 'khor lo bskor/ slar yang bde ldan ri khrod du lug gi lo'i dbyar gsung ngag la sogs pa'i gdams pa zab mo gnang nas/ de'i dgun po gle lung chos sder chos kyi 'khor lo rgya chen po bskor bar mdzad cing / don bdun pa spre'u'i lo'i dbyar zla ba lnga pa dang drug pa rnams la mtshan ma bzlog pa'i ched du thugs dam zab mo mdzad cing / slar yang bdag chen gzhi thog pa la sogs pa'i dam pa rnams la chos kyi char gyis tshim par mdzad do/ /gnyis pa la/ so thar