[A:༦༡༦]ལ་བསམ་གཏན་ཕུག་ཏུ་སྐུ་མཚམས་ཤིན་ཏུ་དམ་པར་མཛད། སྦྲུལ་ལོ་ཤར་མ་ཐག་ཏུ་བདེ་ལྡན་རི་ཁྲོད་དུ་གསུང་ངག་ལ་སོགས་པའི་གདམས་པ་ཟབ་མོ་རྣམས་བཙུགས་ནས་ཆོས་འཕྲོ་རྣམས་རྫོགས་པའི་ཚེ། རིགས་ལྡན་པདྨ་དཀར་པོའི་སྤྲུལ་པ་ཏའི་སི་ཏུ་རྣམ་རྒྱལ་གྲགས་པ་དཔལ་བཟང་པོ་ཡབ་སྲས་དང༌། ངམ་རིངས་ཆོས་སྡེའི་བསྟན་འཛིན་གྱི་སྐྱེས་བུ་རྣམས་ཀྱིས་འབད་པ་ཆེན་པོས་གདན་དྲངས་ཏེ། ཆོས་སྡེར་ཕེབས་ནས། བདག་པོ་ཡབ་སྲས་ལ་དབང་བསྐུར་རྣམ་པར་དག་པ་དང༌། ཆོས་སྡེའི་དགེ་བཤེས་རྣམས་ལ་གསུང་ངག་ལ་སོགས་པའི་དམ་པའི་ཆོས་ཀྱི་ཆར་ཆེན་པོ་ཕབ་སྟེ། རྣམ་གྲོལ་གྱི་ལོ་ཐོག་མ་སྐྱེས་པ་རྣམས་བསྐྱེད་པ་དང༌། སྐྱེས་པ་སྤེལ་བར་མཛད་པ་ཡིན་ནོ། །སླར་ཡང་དེའི་སྟོན་ཨེ་ཝཾ་ཆོས་ལྡན་དུ་ཕེབས་ནས། ཕྱོགས་ཀྱི་དགེ་བའི་བཤེས་གཉེན་སྟོང་ཕྲག་ཙམ་འདུས་པ་ལ། གསུང་ངག་ལ་སོགས་པའི་གདམས་པ་ཟབ་མོ་བསྟན། ཡོ་བྱད་ཀྱི་དངོས་པོ་ཕྱག་ཏུ་བྱུང་བ་རྣམས་ལ། ལ་ལ་ནི་གསེར་གྱི་གན་ཇི་ར་བསྒྲུབས་ཏེ། གཙུག་ལག་ཁང་གི་སྟེང་དུ་བཙུགས། འགའ་ཞིག་ནི་གཙུག་ལག་ཁང་དུ་མཆོད་རྫས་ཀྱི་རྒྱུ་རུ་བཞག །གཞན་དག་ནི། ཆེ་འགོ་རྣམས་ལ་གནང་སྦྱིན་དང༌། དགེ་འདུན་སྤྱི་ལ་བསྙེན་བཀུར་མཛད། དོན་ལྔ་པ་རྟ་ལོའི་དཔྱིད་མུས་སུ་ཕེབས་ནས། བདེ་ལྡན་རི་ཁྲོད་དུ་དད་ལྡན་རྣམས་ལ་གདམས་པ་ཟབ་མོས་ཚིམ་པར་མཛད། དེའི་དགུན་པོ་སླར་ཡང་བྱང་ཡོན་མཆོད་རྣམས་ཀྱིས་གདན་དྲངས་ནས་དཔལ་ངམ་རིངས་སུ་ཕེབས་ཏེ། ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་བསྐོར། སླར་ཡང་བདེ་ལྡན་རི་ཁྲོད་དུ་ལུག་གི་ལོའི་དབྱར་གསུང་ངག་ལ་སོགས་པའི་གདམས་པ་ཟབ་མོ་གནང་ནས། དེའི་དགུན་པོ་གླེ་ལུང་ཆོས་སྡེར་ཆོས་ཀྱི་འཁོར་ལོ་རྒྱ་ཆེན་པོ་བསྐོར་བར་མཛད་ཅིང༌། དོན་བདུན་པ་སྤྲེའུའི་ལོའི་དབྱར་ཟླ་བ་ལྔ་པ་དང་དྲུག་པ་རྣམས་ལ་མཚན་མ་བཟློག་པའི་ཆེད་དུ་ཐུགས་དམ་ཟབ་མོ་མཛད་ཅིང༌། སླར་ཡང་བདག་ཆེན་གཞི་ཐོག་པ་ལ་སོགས་པའི་དམ་པ་རྣམས་ལ་ཆོས་ཀྱི་ཆར་གྱིས་ཚིམ་པར་མཛད་དོ། །གཉིས་པ་ལ། སོ་ཐར་