[A:615]pa rnams lo gcig lhag tsam gyi nang du yongs su rdzogs pa grub ste/ lha bzo ba thams cad kyang bsnyen bkur dang yon la sogs pas yid tshim par byas/ gzungs gzhug dang / zhabs bsdams dang / rab gnas rnams ni rgyud sde dang mthun par mdzad de/ bkra shis kyi dpal 'bar bar bzhugs pa yin no/ /sku gdung la ring bsrel byung ba rnams ni/ gser sku gnyis kyi thugs kar bzhugs shing / lhag ma gdung thal dang bcas pa rnams la sAtstsha khri tsho bdun btab nas/ phyed bde gshegs mchod rten brgyad dang / gtsang khang gi 'bum pa'i nang du bzhugs/ phyed gser la sogs pa'i na bza' can du byas te/ phyogs phyogs su dad pa'i rten du sbyin par mdzad do/ /gnyis pa la gnyis te/ mdzad pa'i rim pa dang sbyar nas mdor bstan pa/ bstan pa'i rim pa dang bstun nas rgyas par bshad pa'o/ /dang po ni/ bla ma mchog gi zhes sogs tshigs bcad gcig ste/ skyes bu dam pa rnams ni gzhan la phan par 'dod pa'i lhag bsam dang / gnas lugs tshul bzhin du nges pa'i shes rab kyi stobs kyis dam pa'i chos ji ltar bstan pa thams cad gdul bya rnams kyi blo dang 'tsham par don du gnyer ba ni chos nyid do/ /de yang 'di ltar chos rje bzang po'i zhabs bde ba can du gshegs pa'i rjes de nas lo gnyis kyi bar du/ dbang / rgyud/ man ngag /lung la sogs pa'i chos kyi 'khor lo rgyun ma chad par bskor bar mdzad cing / de nas don gcig pa sa pho stag gi lo la mus su phebs nas/ bde ldan ri khrod kyi dgon pa btab/ der yang gsung ngag la sogs pa'i chos kyi 'khor lo bsam gyis mi khyab pa bskor nas/ slar yang de'i ston e waM chos ldan du phebs te/ sngar bzhin du gdams pa zab mos gdul bya rnams tshim par mdzad/ de'i tshe stobs kyi 'khor los sgyur ba'i rgyal po rin spungs pa sku mched kyis gdan drangs nas/ chos zab mo zhus te/ de'i ston yang mus su phebs nas/ don gsum pa 'brug gi lo