[A:604]bde mchog /gsang ba 'dus pa/ gshin rje'i gshed la sogs pa'i bskyed pa'i rim pa/ bka' srol de'i lugs thun mong ma yin pa rnams ni lugs gzhan dang ma 'dres pa rnams dang / thun mong sbyang gzhi sbyong ba'i tshul la sogs pa rnams nang phan tshun mi 'gal zhing / rgyud sde'i dgongs pa grub thob kyis bkral ba ji lta ba dang / de la yang phyi nang gi bskyed pa'i rim pa'i khyad par dang / nang bskyed pa'i rim pa la yang / rgyud sde'i khyad par gyis zab khyad kyi rim pa ji ltar yod pa dang / de la gzhan dag gis rtog pas brtags pa'i lugs rnams lung rigs kyis ci ltar dgag pa'i tshul rnams legs par gsan cing sgro 'dogs chod par mdzad de/ rang gis bsgoms na sa lam chod cing / gzhan la bstan na gdul bya mi bslu bar mdzad pa yin no/ /gnyis pa rdzogs pa'i rim pa la/ rdo rje 'jigs byed kyi rwa rtse sems 'dzin/ gshed dmar gyi shin tu spros med/ gsang ba 'dus pa 'phags lugs kyi rim pa lnga/ kye rdo rje sogs la brten pa'i sngar smos pa'i lam skor dgu/ 'khor lo bde mchog dril bu pa'i rim pa lnga/ nag po spyod pa'i rim pa bzhi pa/ rtsa dbu ma lam gyi yan lag dang bcas pa/ bde mchog dkar po'i khrid/ bde mchog snyan brgyud/ dus kyi 'khor lo'i zab lam rdo rje rnal 'byor/ sbyor ba yan lag drug la sogs pa'i rdzogs rim rnams gsan cing thugs nyams su bzhes par mdzad do/ /gsum pa thun mong sgrub pa'i man ngag la/ rab rig 'dzin mkha' spyod 'khor los sgyur ba sgrub pa sogs dang / 'bring grub pa chen po brgyad/ dman pa zhi sogs kyi las rab 'byams sgrub pa'i tshul/ rgyud sde las gsungs pa brgyud pa'i man ngag las byung ba rnams dang / khyad par du dmar po skor gsum la brten nas las sgrub tshul gyi bye brag mang po dang / rdo rje nag po chen po dang / mgon po gdong bzhi pa la brten nas las sgrub tshul