[A:455]yang ma gsan par rgyud bshad pa dang / rgyud ma rdzogs par khong dpon slob glo bur du 'byon dgos pa byung nas/ rgyud bcad pas chos rje'i sku khams log nas 'o brgyal po byung ba dang / nub cig mnal lam du bud med sngon dmar bzhi byung nas/ khyod kyi bla brang shar ba'i bde mchog gi sku bshas nas btsongs zhes zer nas ma mnyes pa'i tshul mang po ston pa byung ba la/ nged kyis bla brang shar pa'i bde mchog gi sku bshas pa med/ bla brang shar pa la bde mchog gi sku gser sku de dang bum sku de gnyis po min pa ni med/ de gnyis da lta bla brang shar na yod ces gsungs/ khong rnams kyis bde mchog gi sku pad gdan phral ba gra cig khyer byung nas 'di khyed kyis phral ba yin zhes zer bas/ rje la yang de bshig pa'i nyes pa yod pa'i gnong cig byung ba rmis pa/ sang mnal sad pa dang / rgyud bcad pa'i 'khu ldog tu dgongs nas/ la ba pa'i bde mchog gi 'grel pa nas bshad pa'i rigs ldan ma'i mchod chog rgyas pa de mdzad pas rje'i sku khams legs par dngas so/ /'di lta bu ni 'phral du bar chad kyi rnam pa lta bur snang yang / phugs yid dam gyis rjes su gzung ba'i mtshan ma yang dag pa yin no/ /yang 'bring mtshams kyi ri bo sgang zhes bya bar lam 'bras gsungs pa'i tshe/ nub cig mnal lam du khang pa bzang po zhig gi nang zhal shar bstan pa zhig na/ rje sa chen yab sras gsum gyi sku shin tu mtshar ba 'od dang 'od zer gyi rang bzhin can gsum dang / chos rje sa paN gyi sku de tsho las cung mog pa cig bzhugs 'dug pa rmi zhes gsungs so/ /de ni bla ma yab sras gsum gyi gsung rab kyi byi dor mthar phyin pa'i rtags yin no/ /gzhan yang me pho rta'i lo'i dgun chos la zab lam dang / brtag gnyis gsungs pa'i tshe/ grwa pa mang po la chos rje'i drung nas la sku chag cung che ba'i rmi lam byung ba dang / grwa pa 'ga' zhig gis logs su mo 'dra btab 'dug pa la yang / sku chag che bas spong dag dang / sku mtshams dam po mdzad