[A:454]yang chos bar gyi gnas gang 'thad du byon nas chos gsungs pa ni/ phal che ba'i dbang du byas na/ dbyar dgun gyi chos dus rgyud sde la sogs pa'i bshad pa dang / sgrub dkyil la sogs pa'i lag len gyi skor dang / gsung ngag la sogs pa'i khrid kyi rim pa sna tshogs pa gsung zhing / ston dpyid kyi dus su rdo rje phreng ba dang / zur bka'i rigs sna tshogs pa gang skabs su bab pa'i dbang bskur rnams zang zing med pa'i chos sbyin mdzad pas/ de la gtad nas phyogs ris kyi dge ba'i bshes gnyen rab tu mang po bla ma sa bzang pas dbang sbyin gnang gin yod pa zhu ba la 'gro zhes zer zhing 'byon pa yin no/ /des mtshon nas chos gang gsungs kyang bstan pa 'ba' zhig la dgongs nas zang zing med pa'i chos sbyin kho na mdzad de/ shAka bzang sku 'bum du sngon gyi dus su gsung ngag zhu ba longs spyod mang po 'bul dgos pa'i lo rgyus cig byung ba'i tshe/ rje'i zhal snga nas sngon gyi dus na bstan pa yar so'i dus su song bas/ gdul bya rnams chos don gnyer dang chos phyogs su dka' spyad dang longs spyod gtong phod che bas gdul bya'i rgyud la rten 'brel khyad par can sgrig pa'i ched du/ sngon gyi bla ma rnams kyis longs spyod mang po 'bul bzhes mdzad pa yin la/ ding sang bstan pa 'grib nas gsung ngag la sogs pa'i bka' chad la khad du song 'dug pas/ gdul bya snod ldan byung na gsung ngag dang dbang bskur la sogs pas brdal gtod lta bu byas nas kyang bstan pa'i rgyun la phan du re byed dgos pa'i dus su 'dug pa zhes gsung ngo / /gzhan yang skabs su rgyud 'bum dang sa skya bka' 'bum la sogs pa'i lung rnams gsungs so/ /skabs shig tu shAka bzang sku 'bum du bde mchog rtsa rgyud cig gsungs pa'i chos tshugs nas zhag mang rab song ba dang / 'dar pa'i dge bshes mkhan chen shAka 'od pa dpon slob gnyis byon nas/ rgyud kyi bshad pa gnang dgos zhus pas/ rgyud la dum bu byas na mi dga' bas da lan mi 'ong zhes zhal ta nan cher gnang