[A:453]mdzad pas sdom pa thob pa bzang ba yin no/ /rig 'dzin sngags kyi sdom pa yang / de snga yan chad la rdo rje phreng ba kr-i ya sa mutstsha dang bcas pa'i dbang bskur yongs su rdzogs pa tshar drug cu tsam mdzad pa de'i sgo nas gdul bya sngags kyi sdom ldan du byas pa yang bsam gyis mi khyab cing / gzhan rgyud sde bzhi dang 'grel pa'i zur bka' ni/ rgyun du ka mdzad pa sngags kyi sdom pa gnang ba'i rnam grangs kyang rje rin po che nyid las mang ba 'ong thabs ga la yod/ de lta bu'i dbang bskur ba de la spyir rgyud sde bzhi la/ dbang bskur gyi babs mi 'dra ba bzhi yod pa la/ nang gses gyi dbye ba rgyud sde re re la yang mi 'dra ba mtha' yas shing / brgyud pa'i bka' srol gyi dbang gis dkyil 'khor re re la yang dbang bskur gyi cho ga mi 'dra ba'i khyad par du ma yod pa rnams la/ dkyil 'khor gang du rgyud sde dang / brgyud pa gang gi lugs kyi dbang bskur mdzad/ lugs de la dgongs shing bshad pa'i cho ga rnams tshig gcig kyang ma tshang ba med pa dang / lugs de la mi dgos shing ma bshad pa rnams tshig re yang ma 'dres par shin tu dag par mdzad pas/ de lta bu'i dbang bskur ba re re thob na yang rgyud sde nas bshad pa'i dbang mtshan nyid pa re thob pa yin pas shin tu don che'o/ /phyag len gyi rnam gzhag 'di gcig pus kyang bstan pa'i byi dor dang bla ma gong ma'i dgongs pa legs par gsal bar byas pa yin no/ /de yang rdo rje phreng ba la sogs pa dang / zur bka'i rigs ji snyed yod pa rnams kyi dbang bskur dus na mdzad dgos kyang de 'phral la thogs med du mdzad pas chog pa yin no/ /de ltar sdom pa gsum gyi sgo nas gdul bya so so'i rgyud tshod dang mthun pa'i tshul khrims rnam par dag pa la bkod nas nyams len gyi rim pa dpal ldan sa skya pa'i bla ma gong ma rnams kyi gsung rab gtso bor gyur pa'i chos kyi 'khor lo sna tshogs pa rgyun du bskor bar mdzad la/ de yang dgung lo bzhi bcu rtsa brgyad du phebs pa yan chad gtso cher gdan sa chen por bzhugs shing gnas skabs su sa bzang dang / gzhan