[A:452]tshul dang lam srol ji snyed byung ba kun so so'i dgongs pa ji lta ba bzhin khyad par phra mo yod pa yang ma 'dres par/ me long g.ya' dag pa la gzugs brnyan ltar/ rje nyid kyi thugs kyi dkyil 'khor la dus rtag tu gsal bar bzhugs pa yin no/ /gsum pa phrin las gzhan don ji ltar mdzad pa'i tshul ni/ dgung lo bco lnga pa la khams pa'i grwa pa'i lag len khrid pa'i slob dpon mdzad pa nas brtsams te/ bstan pa dang sems can gyi don 'ba' zhig mdzad la/ de yang gdul bya'i bsam pa'i dbang gis khrid tshul gyi rnam par sna tshogs pas khrid par mdzad mod/ 'on kyang gtso che ba'i dbang du byas nas gdul bya rnams gzhi tshul khrims rnam par dag pa la bkod nas/ lam nyams len la sbyor bar mdzad pa yin la/ de la so sor thar pa'i dbang du byas na bsnyen par rdzogs pa'i dge slong khri lhag pa'i mkhan po mdzad cing / gzhan dge bsnyen dang dge tshul bgrangs yas pa mdzad do/ /mdor na bod kyi dge ba'i bshes gnyen cig la rab byung bsnyen rdzogs kyi mkhan po mdzad pa'i grangs chos rje rin po che 'di las mang ba ma byung ba yin no/ /byang chub sems dpa'i sdom pa yang gdul bya so so'i zhe 'dod kyi dbu ma lugs dang / sems tsam lugs kyi sems bskyed gang rung re zhu ba dang / gnyis ka zhu ba la gang la gang 'dod kyi sgo nas byang sems kyi sdom pa dang ldan par mdzad pa mtha' yas shing / khyad par gsung ngag rin po che gnang ba'i dus thams cad du sngags lam la 'jug pa'i sngon du rje btsun ga ya dha ra nas brgyud pa'i sems bskyed kyi cho ga dag cing rgyas par gsal bar mdzad pas/ byang sems kyi sdom pa gnang ba yang bsam las 'das pa'o/ /de lta bu'i sdom pa gang 'bogs kyang / las sla dang / dka' tshegs la cung zad kyang mi gzigs par rang rang gi lugs kyi cho ga gang yin pa de 'gal 'khrul nor ba dang / sra sre'i nyes pas gtan nas ma gos par cho ga'i yan lag phra mo tsam la yang rtseg 'dam chen po mdzad nas shin tu dag par