[A:418] phyis rje dpal ldan tshul khrims pa la stod byang pas gdan drangs nas dgon pa mkha' spyod na bzhugs dus phyin pas gsung ngag rin po che'i bka' lung phal che ba tshar gcig zhus/ nyams myong bzang po cig skyes nas yid spro ste sgom 'jur po byas pas nyams kyi snang ba zin tsam byung / yang zhi dgon ri khrod du spyan drangs nas lo gcig dang zla ba lnga bzhugs/ longs spyod kyi zhabs tog kyang bsam gyis mi khyab pa phul nas zhus pas/ gsung ngag rin po che'i smin grol gyi lam yongs su rdzogs pa/ gzhung ji lta ba bzhin gyi khrid thad ka'i nyams rdzogs pa thon thon gyi bar du bsgoms shing / brdar sha bcad nas zhus pas man ngag mtha' dag rdzogs par gnang / de dus kye'i rdo rje'i lus dkyil gyi dbang zhus pa'i tshe/ lus la bde drod dang sems la gsal stong gi ye shes cung zad skyes/ dbang de zin pa'i tshogs 'khor gyi gral du skyug 'dod pa cig byung / bsran pas ma thub nas khrag sha dud mdog can chen po gsum byung / de rjes gzhan du phyin nas skyugs pas dri ngan la skyug bro ba'i khrag mang po 'thon/ de phyin chad sngar gyi bsnyung gzhi de rnams las grol te sku gzugs bzang ba'i mchog cig byung ngo / /mdor na bla ma dpal ldan tshul khrims pa nyid kyis/ bla ma dam pa blo gros brtan pa dang / 'gro mgon chos kyi rje nyid dang / grub chen dkar po brag pa rin chen seng ge gsum las ji ltar gsan pa'i gsung ngag rin po che dang 'brel pa'i dbang / bshad pa/ khrid/ gegs sel/ man ngag phra mo tshun chad kyi bar yongs su rdzogs par zhus pas dbang gi chu bo ma nub pa/ byin rlabs kyi brgyud pa ma nyams/ gdams ngag gi sarga ma log mos gus kyi bsam pa tshim pa ste snyan brgyud bzhi'i byin gyis brlabs shing gdams pas/ brjod bral lhan cig skyes pa'i ye shes mtshon byed dpe'i tshul du thugs rgyud la 'khrungs so/ /rje dpal ldan tshul khrims pas gsung ngag rin po che'i man ngag phal cher rdzogs par gnang ba'i slob ma mang du yod kyang / nyid la ji ltar mnga' ba bzhin gyi gdams ngag phran dang bcas pa ma lus par