[A:417]can 'khrungs so/ /de nas shing khang du chos 'brel zhus pas gsung ngag rin po che'i bla ma'i rnal 'byor la 'pho ba dang bar do'i man ngag zhib mo cig nan tan mdzad nas gnang / de dus sbyor drug gi dmigs pa zhu tshar ba'i dge bshes 'ga' zhig la chos rje nyid kyis mdzad pa'i ngo sprod chen mo gsung gin 'dug pa de thos par 'dod nas/ khrid gnyer la bla ma dpal ldan tshul khrims pa 'dug pa la zhu ba bskur bas/ khyod kyis khrid e thob gsungs/ ma thob byas pas 'o na mi 'ong / zhu dgos zer na zhu ba bya gsung / rgyu mtshan zhus pas khar sang yun ring byin rlabs zhu mkhan de yin na bya gsungs/ bla ma brgyud pa'i rnam thar yan chad song 'dug /de man chad rdzogs par gnang / de dus khrid ma thob kyang snang ba de da lta sbyor drug gi myong ba cung zad 'ong ba de mkhyen par 'dug gsungs/ gzhan mang po chos 'brel zhu yin 'dug na'ang sum pa lo tsA ba'i blo sbyong thob/ yang lan cig nyang stod mag pa'i dge bshes gnyis kyis zhus pa'i zhar la gsang 'dus rim lnga'i nyams len rgyas pa cig thob/ de rnams kyi rten 'brel gyi phyis chos rje dpal ldan tshul khrims pa las gsung ngag rin po che/ rim lnga/ sbyor drug gsum gyi man ngag rgyas par thob pa dang de gsum la go myang cha se ba yod pa 'di dang / gzhan rer tsam la phan pa cung zad byung ba yin gsungs/ gzhan yang 'gro mgon chos rje nyid la snga sor dbu ma lugs kyi sems bskyed kyi cho ga lan gsum/ rnam 'grel/ dus 'khor/ rgyal sras lam bzang rnams kyi chos thun 'ga' re gsan no/ /dus phyis sbrul gyi lo la dpal ldan sa skyar chos rje dpal ldan tshul khrims pa la shar stod kyi gzims khang du dpal kye rdo rje'i rdul tshon gyi dkyil 'khor du rgyu dus kyi dbang bskur ba zhus nas gsung ngag rin po che'i khrid gzhung bshad la sogs man ngag phal cher rdzogs pa cig zhus/ bla ma la dad pa dang man ngag la yid ches bsam gyis mi khyab pa skyes gsungs/