[A:410]pa dang / chos skyong che chung gi skor la sogs pa legs par gsan te man ngag rnams kyi lag len dang bcas pa yang shin tu mkhas par mdzad pa yin no/ /gzhan yang brtag gnyis kyi TI kA chos rje rang gis mdzad pa'i steng nas tshar brgyad/ gur rgyan gyi steng nas gur tshar gcig /gnad kyi gsal byed kyi steng nas sambu Ta tshar gcig /bu ston rin po che'i TI ka'i steng nas sambu Ta tshar gsum la sogs pa gsan no/ /gzhan yang chos rje dpal ldan bla ma dam pa la rgya bod kyi sbyor drug gi rigs ma tshang ba med par mnga' ba rnams kyang tshang bar gsan cing khyad par du sron pa'i skor gyi man ngag gegs sel rnams shin tu mkhas pa'i sgo nas nyams su len pa rnams khrid pa la phul du byung ba yin no/ /gzhan yang dus kyi 'khor lo'i TI kA chos rje nyid kyis mdzad pa'i steng nas bshad pa legs par gsan te/ rgyud 'grel la yang shin tu mkhas shing chos rje nyid kyis mdzad pa'i dus 'khor gyi yig cha'i rigs rnams kyang yongs su rdzogs par gsan no/ /bka' bzhi pa shes rab rgyal mtshan pa las/ 'phags pa dkon mchog brtsegs pa/ 'bum/ nyi khri/ khri brgyad stong pa la sogs pa sher phyogs thams cad dang / gzhan yang lung mang po gsan no/ /bla ma grags mgon pa las sangs rgyas phal po che dang / bstan bcos mang po'i lung gsan/ bla ma mgon po 'bum pa las mdo sde dang / sgrub thabs brgya rtsa la sogs pa rgya gzhung mang po'i lung gsan/ bla ma gung pa bkra shis bzang po las sgrub thabs rgya mtsho dang / rgyud 'bum la sogs pa mang po gsan/ bla ma gzungs kyi dpal ba las chos skyong che chung la sogs pa'i man ngag mang po gsan/ de ltar gsan pa thams cad kyang thos bsam sgom gsum gyi sgo nas mthar phyin par mdzad de ting nge 'dzin gyi rtogs pa bsam gyis mi khyab cing / khyad par 'khor 'das dbyer med kyi lta ba rnam par dag pa rtogs te/ spyod lam rnam bzhi thams cad du de'i ngang las mi g.yo bas sems can