[A:403]ba btab pas khong rnams res cig log song gsungs/ yang skabs shig na da nang tho rangs mkhan chen bu ston rin po che bzhugs pa'i sa cig na/ rdo rje rnal 'byor ma yin snyam pa cig 'dug pa/ mkhan chen bu ston pa na re/ 'di mkha' spyod ma yin no gsungs pa'i snang ba cig byung gsungs/ sku nas gzhon dus su yang / pha dam pa/ kha che paN chen/ sa skya paN chen la sogs pa dang mnal lam du mjal zhing / yang nyin gcig phyag mdzub kyi tshigs la tshod mdzad nas/ 'di ka tsam pa'i de bzhin gshegs pa mang pos zhing 'di thams cad gang 'dug gsungs/ sa skya pa'i gdung rabs yin nges pa rnams la ni/ birWa pa la sogs pa bla ma gong ma rnams zhal gzigs pa dang lung ston pa la sogs pa nges par 'byung ba yin par 'dug pas/ chos rje la yang bla ma gong ma rnams sam/ dag pa'i zhing khams 'dra gzigs pa lags sam zhus pas/ de tsho thams cad khar song nas mang du byon nas bzhud zin pas khyod kyis ma tshor ram gsungs/ de zhib tu ma byung zhing zhu ba yang ma byung bar snang ngo / /dgung lo drug cu re bzhi bzhes pa'i yos lo zla ba drug pa'i bcu dgu'i nyin/ thams cad mthun snang du grub par dri zhim po dang ldang ba byung bas/ khyed rnams kyis spos ci bsregs pa yin/ sus kyang ci yang bsregs pa mi 'dug pas/ lha'i dri bsung gis kun nas khyab pa byung / nyi shu'i nyin gsung chems kyi zhal ta mang po gnang / khyad par du skur ba'i gzhi byung gis dogs nas/ ngas lo bcu bdun la rab tu byung ba nas/ deng phan chad 'dul khrims la ngo lkog med par rnam par dag pa yod pas/ nga la rab tu byung ba dang / bsnyen par rdzogs pa byas pa thams cad yid brtan du rung ba yod ces gsung shog mdzad/ de thams cad dpang du bzhag ste nan tan du mdzad do/ /ji srid bsnyung gi bar la'ang thugs dam gyi rim pa thams cad chags pa'i skabs med cing / khyad par du nyi shu lnga'i nyin yang phyag gis phreng ba 'dzin shugs