[A:404]med bzhin du/ drung na gnas pa kun la phreng ba'i sne mo dang grangs 'dzin du bcug nas bsnyen pa'i rim pa rnams mdzad do/ /nyi shu lnga'i nyi ma phyed tsam na mchod pa dang gtor ma bzang po shoms gsungs/ bshams pas sngags dang phyag rgya ting nge 'dzin gyis byin rlabs rgyas par mdzad nas yi dam mang po'i sngags dang phyag rgya mang po mdzad nas phul te/ gsol ba btab/ smon lam yang mang po mdzad nas/ dgongs mo'i tshe/ do nub mar me gsal po grab gyis/ khyed rnams la brel pa cig byung nyen yod do gsungs/ thugs dam gyi rim pa thams cad grub/ srod kyi dus su zhabs drung na gnas pa kun la khyed rnams res cig rang sar rgyugs gsungs nas song / chen po rin rgyal dang / dge bshes bzang rgyal gnyis zhabs drung na yod pa'i tshe/ 'o da ran byung gsungs nas bzhengs pa'i tshul mdzad gin 'dug /zer ma cig 'ong ba lags sam zhus pas/ min nga rang la rgyus cig bdog gi cog ge ma reg par zhog cig gsungs nas/ 'di 'dra ba'i bde ba/ mi 'gyur ba'i bde ba/ 'dzag med kyi bde ba zhes sogs dang / rdo rje'i tshig /thig le stong pa 'gyur med drug /dbu ma'i thig le/ stong pa nyid kyi thig le zhes brda'i tshig mang po gsungs shing gzugs sku'i bkod pa 'od gsal du 'jug pa'i rim pas don dam chos sku'i ngang du thim pa las bzhengs te/ zung 'jug bde ba chen po'i sku mngon du mdzad pa zhig tu nges te/ de yang rgyud dang man ngag thams cad mthun par dbang po rab tshe 'di la zung 'jug gi bde ba thob ste grub mtha' snyegs/ 'bring tshe 'dir kun rdzob dang don dam pa'i bden pa gnyis skyes bu gom pa 'dor ba bzhin res 'jog tu rgyud la skye ba/ spyod pa gsum gyis mtshams ma sbyar na zung 'jug mi thob pa la/ 'chi kha'i rkyen gyis rlung sems kyi mdud pa grol zhing / des spyod pa'i tsha ba byas nas sngar gyi bden pa gnyis so so'i ting nge 'dzin gcig tu 'dres nas zung 'jug gi bden pa