[A:400]las gzhan don ji ltar mdzad pa'i tshul ni/ bsdu ba bzhi'i sgo nas gong ma'i gnang sbyin la sogs pa/ bla ma/ dpon chen/ rgya bod kyi sde pa/ gra pa bu slob dad pa can rnams kyis phul ba dang / phyag rdzas bsam gyis mi khyab pa byung ba rnams bla ma gong ma rnams kyi nang rten phyi rten/ g.ya' lung 'jag gshongs la sogs pa de dag gi zhig gsos dang / bsam yas kyi gtsug lag khang zhig gsos/ lha sa'i jo bo'i khri rgyab gsar du spos pa/ chos rdzong dang bo dong e ru gtsug lag khang chen po g.yu thog can/ dge 'dun gyi kun dga' ra ba chen po dang bcas pa bzhengs pa dang / gzhan yang sku gsung thugs kyi rten bzhengs pa/ sbyin gtong mdzad de thog mar bla ma rnams kyi nang rten dang thugs dam la thub pa'i gser sku khu tshad ma gdung ring bsrel du ma bzhugs pa cig bzhengs nas rab gnas mdzad pa'i dus su bcom ldan 'das thub pa'i phyag las bdud rtsi 'o ma'i rgyun lta bu 'dzag pa gsol ba rmis pas ting nge 'dzin dang rtogs pa brtan po mang po 'khrungs nas rten 'brel legs po cig byung bas nga skyid du song gsungs/ rten gsungs mang po'i drung du/ gdugs/ rgyal mtshan/ rnga bo che dang / dkar me la sogs pa mchod pa'i bye brag bsam gyis mi khyab pa phul bas/ dad pa can gyi bsod nams bsags pa'i bstan pa'i rgyun 'phel ba'i dmigs rkyen mdzad pa yin no/ /bo dong dang bsam yas su dbus gtsang gi sa cha la bzhugs pa'i chos sde chen po'i bla ma mkhan slob/ sde snod 'dzin pa'i dge 'dun rgya mtsho lta bu spyan drangs nas/ chos rje'i drung nas thugs bskyed gsungs pa la sogs pa chos kyi 'khor lo rgya chen po bskor te/ zang zing gi sbyin pa gser dngul/ gos dar/ ja snam dang / nas kyi phung po ri rab tsam gsum gyi thog drangs pa'i 'dzam bu'i gling pa'i 'byor pa'i bye brag phun sum tshogs pas dge ba'i bshes gnyen rnams la 'bul ba dpag tu med pa dang / dge 'dun dang skye bo'i tshogs grangs med pa la gser la