[A:401]sogs te zho re re'i gral 'gyed dang / nas kyi rgyugs 'gyed dang bcas pa mdzad pas/ thams cad ngo mtshar zhing yid tshim par mdzad/ ti shrI kun blo'i chos 'khor gyi rjes la rgan gsum gyis dran nas de lta bu ma mthong zhes grag go /gzhan yang thos bsam sgom gsum mdzad pa mang po'i mthun rkyen sbyar ba dang / dbul zhing phongs pa rnams la zas gos la sogs pa ci nus su sbyin pa mdzad de/ sgrub mchod/ gsung sgrogs/ dge 'dun gyi bsnyen bkur la sogs pa/ bstan pa dang sems can gyi don 'ba' zhig gi phyogs su gtong bar mdzad/ chos kyi sbyin pa ni sa skya la sogs par/ rgyud gsum man ngag dang bcas pa/ rnam 'grel/ spyod 'jug la sogs pa dang / snye thang dang bo dong du dus 'khor 'grel chen/ gsang 'dus/ phar tshad mngon gsum la sogs pa dang / bsam yas la sogs pa gang du gshegs pa dang bzhugs pa'i sa phyogs der mdo rgyud bstan bcos man ngag du ma'i bshad srol dang / dbang byin rlabs/ sems bskyed/ dge slong dge tshul la las kyi cho ga 'chad pa dang / rtsod pa dang / bka' bstan bcos man ngag du ma'i bshad srol dang dgongs 'grel rtsom pa mang po mdzad pas/ gangs can gyi khrod du chos lugs rnam par dag pas bstan pa rin po che nyi ma'i 'od zer las kyang ches lhag pa ltar gsal bar mdzad cing / lus can dpag tu med pa mtho ris dang / thar pa dang / thams cad mkhyen pa'i lam la bkod do/ /skyabs kyi sbyin pa ni/ mi nag can la sogs te drung du skyabs 'tshol ba du ma yang byams pa chen pos nye bar 'tshe ba du ma las bskyangs pa dang / su la yang tshig rtsub ngan smra la sogs pa zhal gyi sgo nas mi 'byung ste 'jam zhing snyan la tshad mar gyur pa don dang ldan pa bzung bar 'os pa dang / sku gsung thugs kyi spyod pa thams cad dge ba 'ba' zhig gis dus 'da' bas gdul bya rang rang gi