[A:༤༡]ཤེས་པའི་མངོན་པར་ཤེས་པ་ལ་སོགས་པ་དང༌། ནང་དུ་ཡང་དག་པར་འཇོག་པ་ལ་སོགས་པ་བསམ་གྱིས་མི་ཁྱབ་པར་བདག་ཅག་ལ་ངེས་ཤེས་ཡོད་མོད་ཀྱི། འོན་ཀྱང་བཀས་མ་གནང་བས་མ་བྲིས་སོ། །གཞན་ཡང་བླ་མ་ལ་གུས་པ་ནི། རྗེ་བླ་མ་ཡབ་སྲས་ངེས་པར་རྡོ་རྗེ་འཆང་ཡིན་པ་ལ་ཐེ་ཚོམ་མམ་ཡིད་གཉིས་གཏན་མི་མངའ་བ་ཡིན་པར་ངེས་ལ། དེའི་ཕྱིར་དེ་དག་ཞལ་བཞུགས་པ་ན་སྐུ་གསུང་ཐུགས་ཇི་ལྟར་མཉེས་པ་བཞིན་བསྒྲུབས་ནས་ཐ་ན་ཀྱལ་ཀའི་ཕྱིར་ཡང་གསུང་མི་ལྡོག་ལ། སྐུ་འདའ་བའི་ཚེ་ན་ཡང་བདག་ཉིད་གླུད་དུ་གཏོང་བའི་བར་དུ་མཛད་ལ། སྐུ་འདས་ནས་ཀྱང་མཆོད་པའི་ཕྱིར་བླ་མ་ས་སྐྱ་པ་ཆེན་པོའི་འདད་ལ་ཕྱོགས་ཀྱི་དགེ་བའི་བཤེས་གཉེན་ཆེན་པོ་རྣམས་སྤྱན་དྲངས་ནས་ཆོས་འཁོར་ཆེན་པོ་མཛད་དེ། འབུམ་ལྔ་བཅུ་ཙམ། ཉི་ཁྲི་བརྒྱ་སུམ་ཅུ་ལྷག་ཙམ་ཅིག །དཀོན་མཆོག་བརྩེགས་པ་བརྒྱད་ཅུ་ལྷག་ཙམ་ཅིག་དང༌། དེ་ལ་སོགས་པ་ཆོས་དང་ཟང་ཟིང་བརྗོད་ཀྱིས་མི་ལང་པ་དིང་སང་གི་བར་དུ་ཡང་སྐྱེ་བོ་རྣམས་ཀྱིས་སྙན་གྲགས་སྒྲོགས་པར་མཛད་ལ། ཡང་སློབ་དཔོན་གཅེན་རྒྱ་གར་དུ་ལོ་ཙཱ་སློབ་པ་ལ་མ་ག་དྷར་སྐུ་གཤེགས་པའི་འདད་ལ་ཡང༌། ལོ་པཎ་སྤྱན་དྲངས་པའི་ཆོས་འཁོར་མཛད་ནས་ཆོས་དང་ཟང་ཟིང་གི་སྦྱིན་གཏོང་རྒྱ་ཆེན་པོ་མཛད་དོ། །ཡང་སློབ་དཔོན་རིན་པོ་ཆེ་སྐུ་འདས་པ་ན་ཕྱོགས་ཀྱི་དགེ་བའི་བཤེས་གཉེན་རྣམས་སྤྱན་དྲངས་ནས་ཆོས་འཁོར་ཆེན་པོ་མཛད་དེ། འབུམ་ཆ་སུམ་ཅུ་སོ་བདུན། ཉི་ཁྲི་བརྒྱད་ཅུ་ཙམ། དཀོན་མཆོག་བརྩེགས་པ་ལྔ་བཅུ་ཐམ་པ། གསེར་གྱི་བརྒྱད་སྟོང་པ་དང༌། འཇམ་སྡུད་ལ་སོགས་པ་བདོག་པ་ཐམས་ཅད་བཏང་སྟེ། ཐ་ན་ན་བཟའ་དང༌། ཞལ་བུ་ཚུན་ཆད་བཏང་བ་དང༌། ཡང་སློབ་དཔོན་གཅུང་སྐུ་འདས་པ་ན་ཕྱོགས་ཀྱི་དགེ་བའི་བཤེས་གཉེན་རྣམས་སྤྱན་དྲངས་ནས། འབུམ་ཆ་སུམ་ཅུ་རྩ་ལྔ། ཉི་ཁྲི་བརྒྱ་ཉི་ཤུ་ཙམ། དཀོན་མཆོག་བརྩེགས་པ་སུམ་ཅུ། གསེར་