[A:261a]lta bu/ skye ba gcig gis thogs pa'i byang chub sems dpar zhal gyis bzhes pa ste/ ting nge 'dzin rgyal po las/ ye shes bla med 'di ni rab bsgrubs nas/ /phyi dus mod la de ni 'jig rten du/ /rgyal ba dri med 'od ces bya bar 'gyur/ /zla 'od gzhon nur gyur pa bdag nyid kyi/ /lung bstan 'di thos dga' ba rgyas gyur te/ /zhes dang / snying rje padma dkar po las kyang / byang chub sems dpa' byed pa'i dge ba'i rtsa ba rgya chen po rnam pa sna tshogs bsags nas 'chi ba'i dus byas ma thag tu nub phyogs su sangs rgyas kyi zhing bye ba brgya stong 'das pa na de bzhin gshegs pa 'od dpag med kyi sangs rgyas kyi zhing 'jig rten gyi khams bde ba can du skye bar 'gyur te/ 'jig rten gyi khams yon tan thams cad kyi brgyan pa zhes bya bar de bzhin gshegs pa 'od dri ma med pa zhes bya bar 'gyur ro/ /kun dga' bo dge slong 'tsho byed de'ang nga'i bstan pa 'di yangs shing rgyas par byed par 'gyur gyi/ kun dga' bo khyod mya ngan ma byed cig ces gsungs so/ /dus de'i tshe khams pa mi gsum gyis dam tshig gi rdzas cung zad cig gsol bas nyams 'ur/ de dge skos kyis thos nas khong gsum bskrad pas sgam po'i lha mchod thams cad mgo rting log rjes ci yin gsung / rgyu mtshan gsol bas/ khong tsho mi 'dug na nga'ang mi sdod gsung dra chung rgyab tu bsnams/ sba mkhar phyag tu bzung nas phebs pas gling gi smad du khong gsum dang mjal/ pha bong steng ma'i khar bla mas bro 'khrabs te yar shog gsungs/ 'og ma'i khar khong gsum gyis bro 'khrabs te yar 'ong zhu bas pha bong gnyis ka zhabs kyis 'dam brdzis pa ltar gyur to/ /der lo bcu gnyis 'gro don mdzad/ bdun cu rtsa lnga pa la gshegs/ slob ma bsam gyis mi khyab pa las mchog gyur dngos kyi gdan sa sgom tshul/ sras kyi thu bo khams pa mi gsum/ 'ba' rom pa la sogs sgam po'i grub thob bco brgyad du grags pa rnams so/ /mar mi la gdan sa'i ka dpe ma med/ sgom pa chen po rje zla 'od gzhon nu rang gi gdan sar mnga' gsol ba yin/ de'ang rje sgam po pa'i gcen po rgya pa se re dang / yum tshe lcam gnyis la sgom pa sku mched gsum 'khrungs pa'i bar pas mi chos gzung / bgres pa tshul khrims snying po/ chung ba shes rab byang chub/