[A:262a]dang po dgung lo bcu bdun pa la/ dge bshes mnga' ris pa la rab tu byung / lo nyi shu pa la sha ba pa gling du bsnyen par rdzogs/ rjes gdam ngag thams cad gnang / lam phug dang sha 'ug stag sgo sogs su bsgrub pa mdzad/ dgung lo so lnga pa la gdan sar dbang bskur/ de'i dus da nga rgas pas khyed rang rnams tshul khrims snying po la btud cig gsung / dpal khams pa chen pos kyang bla ma gnyis par bkur na gzhan rnams lta ci/ sgam po'i nang rten mchod khang grub nas/ stod lung du gnas brtan shes rab grags kyis spyan drangs/ 'tshur lha lung gi dgon pa btab/ dbus gtsang khams gsum gyi grwa pa tshad che ba 'dus/ lha sar phebs pa'i tshe/ lha sa sde 'khrug gi skyon gyis re srul du song 'dug pa gso bar mi nus sam snyam pa byung ba'i tshe/ mnal lam du rje sgam po pas khyed kyis nga 'jog phod dam gsungs pa byung / jo bo shAkya'i sku yis dngos su spyan chab phyung bas/ de nyid du bzhugs nas zhig gsos mdzad/ gser ston la sogs pa'i srol btsugs/ 'dis sgam po pa lung bstan du/ de nga'i sku gdung gi mchod rten zhig cing ral ba mthong nas gser gyis brgyan par byed cing / gdugs dang / rgyal mtshan dang / ba dan dang / dar dang / dril bu g.yer kha'i dra ba g.yog pa dang / de bzhin gshegs pa'i sku gzugs dang / mchod rten gyi khang pa dang / mchod rten rnams sengge'i rgyal mtshan gyis brgyan te/ lha dang mi rnams dga' ba skye zhing / de yongs su skyong ba dang / nga'i bstan pa yongs su bskyang ba dang / sems ma dad pa rnams dad par bya ba dang / dad pa rnams phyir zhing 'phel ba dang / skye bo mang po'i dge ba'i rtsa ba tshogs bsags pa'i phyir lo lnga pa byed du 'jug par 'gyur ro zhes bstan pa 'di yin zer ro/ /phyag sor ba dang gtsang nag pa sogs kyis zhabs la btud/ lnga bcu rtsa bzhi pa la gshegs/ gdan sa gcung sgom chung gis lo gnyis bzung zhe bzhi pa la gshegs/ de'i gdan sa khu dbon gsum ka'i sras dwags po 'dul 'dzin gyis bskyangs te/ de ni sha mi 'dul 'dzin gyi slob ma la 'dul ba la mkhas pa chen po sde snod gzhan gnyis kyang legs par thugs su chud pa 'dis mchod khang chen mo btab/ bar du 'bri gung gling pas gdan sa yud cig dang / 'brug pa rgyal dbang rjes lo drug gzhan spyan snga sgom pa nyid kyi