[A:432]sbyangs dpyid phyin par mdzad/ rje kun dga' rdo rje las kyang/ rgyud 'bum 'dul ba lung/ bla ma gong ma'i bka' 'bum dang/ dbang rjes gnang mang du gsan/ bdag po mthu stobs kyi dbang phyug glang thang du spyan drangs nas/ dbang bka' mang po dang chos skyong gi rjes gnang dang/ man ngag mang du gsan/ rje stag lung pa ngag dbang grags pa las/ bde mchog 'jigs byed la sogs pa'i dbang kha cig dang/ do hadwa ha skor gsum/ na ro ni gu'i chos drug dkar brgyud gser phreng la sogs pa dgas po dkar rgyud pa'i gsung rabs grags che ba mang du gsan/ bdag chen chos kyi rje blo gros pa dang/ chos rje gung ru ba las kyang/ bde mchog nag po pa'i chos skor gsan/ mdor na rje 'di pa rang lo so bdun pa yan chad du gsan pa dang bslab sbyangs rgya che zhing/ chos bshad dang bsgrub mchod kyi gtso bor mang du mdzad/ so bdun pa nas zhe dgu pa'i bar sngon nyid nas thun bzhi'i rnal 'byor la mi g.yel ba'i steng du yang ches cher nan tan du mdzad nas sgrub pa nyams len gtso che/ lo re la lam 'bras zla gsum ma dang/ bka' 'bum so so'i lung re tsam gnang ba mdzad/ de dag gi skabs su sa lam gyi yon tan dang ye shes brnyes tshul/ lhag pa'i lhas zhal bstan tshul sogs ni/ rgyun du ba'i nyams len gyi mdzad tshul sogs dang/ gnas skabs so sor sgrub pa la lo grangs tshang bar bzhugs tshul sogs la dpags na khyad par can mang po mnga' bar snang mod/ phyi ltar du mi gsung bas bri bar ma nus so//
de ltar mngon par mtho ba'i go 'phangs mchog tu gyur pa brnyes pa'i ngang nyid nas/ lo grangs mang po mdo sngags kyi bslab sbyangs mang po pa dag dang/ rang lo nyer bzhi pa