[A:432]སྦྱངས་དཔྱིད་ཕྱིན་པར་མཛད། རྗེ་ཀུན་དགའ་རྡོ་རྗེ་ལས་ཀྱང། རྒྱུད་འབུམ་འདུལ་བ་ལུང། བླ་མ་གོང་མའི་བཀའ་འབུམ་དང། དབང་རྗེས་གནང་མང་དུ་གསན། བདག་པོ་མཐུ་སྟོབས་ཀྱི་དབང་ཕྱུག་གླང་ཐང་དུ་སྤྱན་དྲངས་ནས། དབང་བཀའ་མང་པོ་དང་ཆོས་སྐྱོང་གི་རྗེས་གནང་དང། མན་ངག་མང་དུ་གསན། རྗེ་སྟག་ལུང་པ་ངག་དབང་གྲགས་པ་ལས། བདེ་མཆོག་འཇིགས་བྱེད་ལ་སོགས་པའི་དབང་ཁ་ཅིག་དང། དོ་ཧདྭ་ཧ་སྐོར་གསུམ། ན་རོ་ནི་གུའི་ཆོས་དྲུག་དཀར་བརྒྱུད་གསེར་ཕྲེང་ལ་སོགས་པ་དགས་པོ་དཀར་རྒྱུད་པའི་གསུང་རབས་གྲགས་ཆེ་བ་མང་དུ་གསན། བདག་ཆེན་ཆོས་ཀྱི་རྗེ་བློ་གྲོས་པ་དང། ཆོས་རྗེ་གུང་རུ་བ་ལས་ཀྱང། བདེ་མཆོག་ནག་པོ་པའི་ཆོས་སྐོར་གསན། མདོར་ན་རྗེ་འདི་པ་རང་ལོ་སོ་བདུན་པ་ཡན་ཆད་དུ་གསན་པ་དང་བསླབ་སྦྱངས་རྒྱ་ཆེ་ཞིང། ཆོས་བཤད་དང་བསྒྲུབ་མཆོད་ཀྱི་གཙོ་བོར་མང་དུ་མཛད། སོ་བདུན་པ་ནས་ཞེ་དགུ་པའི་བར་སྔོན་ཉིད་ནས་ཐུན་བཞིའི་རྣལ་འབྱོར་ལ་མི་གཡེལ་བའི་སྟེང་དུ་ཡང་ཆེས་ཆེར་ནན་ཏན་དུ་མཛད་ནས་སྒྲུབ་པ་ཉམས་ལེན་གཙོ་ཆེ། ལོ་རེ་ལ་ལམ་འབྲས་ཟླ་གསུམ་མ་དང། བཀའ་འབུམ་སོ་སོའི་ལུང་རེ་ཙམ་གནང་བ་མཛད། དེ་དག་གི་སྐབས་སུ་ས་ལམ་གྱི་ཡོན་ཏན་དང་ཡེ་ཤེས་བརྙེས་ཚུལ། ལྷག་པའི་ལྷས་ཞལ་བསྟན་ཚུལ་སོགས་ནི། རྒྱུན་དུ་བའི་ཉམས་ལེན་གྱི་མཛད་ཚུལ་སོགས་དང། གནས་སྐབས་སོ་སོར་སྒྲུབ་པ་ལ་ལོ་གྲངས་ཚང་བར་བཞུགས་ཚུལ་སོགས་ལ་དཔགས་ན་ཁྱད་པར་ཅན་མང་པོ་མངའ་བར་སྣང་མོད། ཕྱི་ལྟར་དུ་མི་གསུང་བས་བྲི་བར་མ་ནུས་སོ༎
དེ་ལྟར་མངོན་པར་མཐོ་བའི་གོ་འཕངས་མཆོག་ཏུ་གྱུར་པ་བརྙེས་པའི་ངང་ཉིད་ནས། ལོ་གྲངས་མང་པོ་མདོ་སྔགས་ཀྱི་བསླབ་སྦྱངས་མང་པོ་པ་དག་དང། རང་ལོ་ཉེར་བཞི་པ་