[A:421]nyams mang po rang byung bas/ gzigs thag chod na'ang/ zhal bzhes mi mdzad pa ni khong pa rang gi chos lugs yin zhes zer/ brag dkar du bsnyung tshul de ltar bstan pa'i 'phro nyid nas/ tshes bcu gnyis kyi tho rangs/ snga thun gyi thugs dam gyi rim pa rdzogs par zin nas/ bla ma gong ma rnams bde bar bskyod pa'i lam ni gsal po de nyid do// zhes thugs khar thal mo sbyar/ 'od gsal ba dang bsam gyis mi khyab pa'i rim pa nyid nas bde bar gshegs so//
de ltar na/ spyir gsang sngags bla med kyi zab lam rdo rje'i rnal 'byor la mnga' brnyes pa/ thun bzhi'i rnal 'byor la mchog tu gzhol ba rnams kyi nang gi yon tan/ khams 'du lugs dang/ lta ba rtogs tshul dang/ grub mtha' bsnyogs pa'i rim pa rnams bsam gyis mi khyab pas na/ 'dir thun mong gi rnam par thar pa nyid du 'bri bar ga la nus/ de lta mod kyi/ phyi rol nas rgyal sras chen por mtshon pa'i rtags dang mtshan ma ni/ 'di gang na bzhugs pa'i gnas der/ bza' btung dang mkho rgu'i yo byad thams cad char bzhin du 'bab/ phyogs kyi la sgo dang gser dngul la sogs pa'i sgo bye/ phyogs kyi grwa rgyun dang tshongs pa rnams bde bar sleb/ mtshungs med kyi dge ba'i bshes gnyen nyi zla lta bu dang/ de sras skar ma'i tshogs rnams gsal bar byon zhing bde bar bzhugs/ de dag ni phyi'i mtshan ma yin la/ nang gi khyad par ni/ rjes thob kyi mdzad pa'i khyad par las rtogs par nus pa'i phyir na/ ji skad du/ sher phyin las/ sa dang po nas sa lnga pa'i bar yongs su sbyong ba'i rjes thob kyi mtshan mar gsungs pa de thams cad phyag bzhes su mnga' bar phal cher gyi mngon sum du grub pa nyid las shes so//
skal bzang gdul bya'i tshogs rnams kyi//
blo mtsho'i me long dngas pa la//
rgyal sras sku gsungs thugs rnams kyi//
rang bzhin gsal bar snang mod