[A:383]nyams dga' la bkra shis pa'i dge mtshan du ma dang ldan pa'i spyang lung dpal gyi ri khrod kyi sa phyogs 'di nyid du lo bco brgyad kyi bar du skyil mo krungs gcig las ma g.yos par sgrub pa rtse gcig tu mdzad nas/ bcu gsum rdo rje 'dzin pa'i sa brnyes par mdzad la/ de nas lcags mo glang gi lo la mya ngan las 'da' ba'i tshul ston par mdzad pa yin no//
de yi mthu yis gnas 'dir yang//
mchog dang thun mong ji snyed pa//
rgya mtsho che la chu bo bzhin//
'bad pa med par ngang gis so//
de yang rgya mtsho chen por chu bo bzhi rang gi ngang gis 'bab pa bzhin du skyes bu chen po des byin gyis brlabs pa'i gnas 'dir yang/ ka lA pa yi grong khyer chen po ji lta ba bzhin du dpa' bo dang rnal 'byor ma'i tshogs dpag tu med pa rang gi ngang gis 'du zhing byin gyis rlob par byed pa lung dang rtogs pa'i yon tan rnams ngang gis gong nas gong du rnam par 'phel zhing thun mong gi dngos grub ji snyed pa 'bad par ngang gis 'du ba ni yid bzhin gyi rgya mtsho ji lta ba bzhin no//
kun mkhyen de yi 'phrin las kyi//
mdzad pa'i lhag ma ma lus pa//
bsams bzhin yongs rdzogs mdzad pa ni//
dpal ldan gzhon nu blo gros so//
zhes bya ba smras te/ ji skad du bshad pa'i skyes bu chen po des kyang// rang nyid kyis mchog gi dngos grub brnyes pa'i sa phyogs 'di nyid du skal pa dang ldan pa rnams rjes su bzung ba'i phrin las kyi lhag ma 'ga' zhig bsgrub par bya ba'i phyir dang/ gzhan ngor lam lhag ma 'ga' zhig lus pa lta bur snang ba de slar yang rten khyad par can gyi rten la thugs nyams bzhes te/ zung 'jug gi sku mngon du mdzad pa'i phyir bsams bzhin du sa cha 'di nyid du skye ba bzhes pa ni bdag cag gi bla ma dam pa nyid yin par nges so//
2
gnyis pa la/ 2.1
mngon mtho'i go 'phang