[A:383]ཉམས་དགའ་ལ་བཀྲ་ཤིས་པའི་དགེ་མཚན་དུ་མ་དང་ལྡན་པའི་སྤྱང་ལུང་དཔལ་གྱི་རི་ཁྲོད་ཀྱི་ས་ཕྱོགས་འདི་ཉིད་དུ་ལོ་བཅོ་བརྒྱད་ཀྱི་བར་དུ་སྐྱིལ་མོ་ཀྲུངས་གཅིག་ལས་མ་གཡོས་པར་སྒྲུབ་པ་རྩེ་གཅིག་ཏུ་མཛད་ནས། བཅུ་གསུམ་རྡོ་རྗེ་འཛིན་པའི་ས་བརྙེས་པར་མཛད་ལ། དེ་ནས་ལྕགས་མོ་གླང་གི་ལོ་ལ་མྱ་ངན་ལས་འདའ་བའི་ཚུལ་སྟོན་པར་མཛད་པ་ཡིན་ནོ༎
དེ་ཡི་མཐུ་ཡིས་གནས་འདིར་ཡང༎
མཆོག་དང་ཐུན་མོང་ཇི་སྙེད་པ༎
རྒྱ་མཚོ་ཆེ་ལ་ཆུ་བོ་བཞིན༎
འབད་པ་མེད་པར་ངང་གིས་སོ༎
དེ་ཡང་རྒྱ་མཚོ་ཆེན་པོར་ཆུ་བོ་བཞི་རང་གི་ངང་གིས་འབབ་པ་བཞིན་དུ་སྐྱེས་བུ་ཆེན་པོ་དེས་བྱིན་གྱིས་བརླབས་པའི་གནས་འདིར་ཡང། ཀ་ལཱ་པ་ཡི་གྲོང་ཁྱེར་ཆེན་པོ་ཇི་ལྟ་བ་བཞིན་དུ་དཔའ་བོ་དང་རྣལ་འབྱོར་མའི་ཚོགས་དཔག་ཏུ་མེད་པ་རང་གི་ངང་གིས་འདུ་ཞིང་བྱིན་གྱིས་རློབ་པར་བྱེད་པ་ལུང་དང་རྟོགས་པའི་ཡོན་ཏན་རྣམས་ངང་གིས་གོང་ནས་གོང་དུ་རྣམ་པར་འཕེལ་ཞིང་ཐུན་མོང་གི་དངོས་གྲུབ་ཇི་སྙེད་པ་འབད་པར་ངང་གིས་འདུ་བ་ནི་ཡིད་བཞིན་གྱི་རྒྱ་མཚོ་ཇི་ལྟ་བ་བཞིན་ནོ༎
ཀུན་མཁྱེན་དེ་ཡི་འཕྲིན་ལས་ཀྱི༎
མཛད་པའི་ལྷག་མ་མ་ལུས་པ༎
བསམས་བཞིན་ཡོངས་རྫོགས་མཛད་པ་ནི༎
དཔལ་ལྡན་གཞོན་ནུ་བློ་གྲོས་སོ༎
ཞེས་བྱ་བ་སྨྲས་ཏེ། ཇི་སྐད་དུ་བཤད་པའི་སྐྱེས་བུ་ཆེན་པོ་དེས་ཀྱང༎ རང་ཉིད་ཀྱིས་མཆོག་གི་དངོས་གྲུབ་བརྙེས་པའི་ས་ཕྱོགས་འདི་ཉིད་དུ་སྐལ་པ་དང་ལྡན་པ་རྣམས་རྗེས་སུ་བཟུང་བའི་ཕྲིན་ལས་ཀྱི་ལྷག་མ་འགའ་ཞིག་བསྒྲུབ་པར་བྱ་བའི་ཕྱིར་དང། གཞན་ངོར་ལམ་ལྷག་མ་འགའ་ཞིག་ལུས་པ་ལྟ་བུར་སྣང་བ་དེ་སླར་ཡང་རྟེན་ཁྱད་པར་ཅན་གྱི་རྟེན་ལ་ཐུགས་ཉམས་བཞེས་ཏེ། ཟུང་འཇུག་གི་སྐུ་མངོན་དུ་མཛད་པའི་ཕྱིར་བསམས་བཞིན་དུ་ས་ཆ་འདི་ཉིད་དུ་སྐྱེ་བ་བཞེས་པ་ནི་བདག་ཅག་གི་བླ་མ་དམ་པ་ཉིད་ཡིན་པར་ངེས་སོ༎
2
གཉིས་པ་ལ། 2.1
མངོན་མཐོའི་གོ་འཕང་