[A:394]gyi khrod du ji snyed 'gyur ba'i man ngag gi cha brgyud pa ma nub pa rnams la bla ma dam pa 'dis ma gsan pa ni gcig kyang med pa yin no//
slar smras pa/
tshe 'dir rdo rje 'chang dbang gi//
go 'phang stsol mkhas gdams ngag kun//
khyod kyi thugs la bsdus gyur na//
bdag cag 'khor bar 'khyams kyi dogs//
'on kyang nyin mo'i dpal 'bar ba//
ji snyed pad mo'i tshal gyi ni//
khyed kyi dge legs ji snyed pas//
bdag cag rnams dang thun mong ngo//
zhes bya'o//
'o na man ngag de dag thugs nyams su bzhes pa la brten nas yon tan gyi khyad par ci zhig mnga' zhe na/
2.2.1.2.3.1
thun mong gi dngos grub brnyes pa'i tshul dang/ 2.2.1.2.3.2
mchog gi dngos grub brnyes pa'i tshul lo//
2.2.1.2.3.1
dang po ni/ chen po rnams ni mchog bsgrubs pas thun mong zhor la 'grub pa chos nyid du snang ste/ rtsa rlung thig le thams cad la dbang thob pas mi dang mi ma yin pa'i 'gro ba thams cad dbang du bsdus te lha dang mi'i zas nor thams cad char bzhin du 'bab cing/ de'i tshe/ ma chags pa'i blos phyi nang gi bdog pa thams cad la mchod pa'i zhing dang dman pa rnams la 'phangs pa med par gtong kyang/ bkod ma'i chu bzhin du longs spyod par mdzad pa nyid rnam par 'phel ba'i rgyur snang ngo//
srog rtsol mngon du gyur pas 'chi ba med pa'i dngos grub brnyes shing sku tshe 'dor len la dbang thob ste/ da lta brgyad cu rtsa lnga'i dus su yang lang tsho dar la bab pa bzhin du zo mdog bzang ba dang ldang ba yang zhing sku nyams dang ldan par bzhugs pa 'di yin no//
der ma zad/ bsgoms pa las byung ba'i shes rab phun sum tshogs pa mngon du gyur pa'i stobs kyis sngar sbyangs pa'i gsung rab dag kyang bsnyel ba med par ches cher shin tu gsal bar gyur cing gzhan ngor ma sbyangs pa lta bur snang ba rnams kyang chos rgyun gyi ting nge 'dzin gyi mthu la brten nas bla ma na 'phos pa'i dbang gis gang la yang thogs pa med pa'i