[A:393]ni gu chos drug la sogs pa shangs pa'i chos skor ma lus pa dang/ yang dgon pa'i ri chos skor ma lus pa gsan cing/ chos drug gi nyams len la rtsal du bton pas 'od gsal chen po'i ngang nas sangs rgyas kyi zhing rab 'byams du mar sku lus bye ba phrag brgyar sprul nas mchod pa dang/ bsnyen bkur ba dang/ theg pa chen po'i chos kyi dga' ston myong ba la sogs pa la mthu thogs pa med pa thob pa yin no//
de nas de tsam gyis kyang chog par 'dzin pa med par theg chen chos kyi rgyal po'i drung du/ lam 'bras bu dang bcas pa'i gdams ngag man ngag dang bcas pa ma lus shing lus pa med par gsan cing thugs nyams su bzhes pas snod bcud kyi 'jig rten thams cad dkyil 'khor gyi 'khor lo'i rnam par shar zhing/ lam dus kyi thun bzhir dbang bzhi nyams su blangs pas bde ba dang stong pa zung du 'jug pa'i dpal la rtag tu dgyes par rol zhing/ bde chen gyi sgrib pa rang sar dag pa yin par nges so//
de nas/
'dod pa can rnams nor gyis ni//
chog mi shes so khyed kyi thugs//
sems can kun gyi don gyi phyir//
dam chos bdud rtsi'i ro yis so//
zhes smras te/ 'dod pa can nor gyis chog shes med pa bzhin du/ man ngag de tsam gyis chog par 'dzin pa med par skyes dgu'i gtsug rgyan dam pa spyan snga ba chos kyi rje bsod nams rgyal mtshan dpal bzang po'i drung du/ nA ro'i chos drug cha lag dang bcas pa ma lus par gsan cing thugs nyams su bzhes pas gtum mo la brten nas bde drod ngang gis 'bar zhing/ sgyu lus la brten nas 'ja' tshon lta bu'i sku mngon du gyur te zung 'jug gi sku mngon du mdzad pa la mthu thogs pa med pa dang ldan pa zhig yin par nges so//
gzhan yang bla ma so so'i drung du lam gyi cha lag yongs su rdzogs pa'i man ngag gsan pa ni bsam gyis mi khyab ste/ gangs can