[A:33]pha rol tu son pa'i go 'phang mchog brnyes te/ dgung lo bco brgyad du phebs pa shing mo glang gi lo nas zur 'chad kyi ming bzhag gi 'chad nyan yar ngo'i tshes kyi 'phel ba la 'gran par bzod pa'i rnam dkar gyi phrin las spel ba'i gsung gi bdud rtsi'i bgo skal thog mar bzhes pa yang/ gur na rab 'byams phyogs las rnam par rgyal ba'i lha zhes pas mtshon pa dag cig la/ gang sngon chad su gang dag gi rna ba'i yul du ma 'ongs pa'i legs par bshad pa gsar pa dag cig gis mgron du mdzad mdzad pa na/ gdul bya ma lus pa'i yid dbang lhag par gsos te gsung gi bdud rtsi'i btung bas rang rang gi skal ba ji lta'i dbang po tshim pa nye bar thob ces phyogs bcur grags pa'i gtam dag go//
phyogs su ma chad bde ba'i dbus shig na//
chos smra'i dga' tshal phyogs bcu'i mgon po'i khyim//
sngon med legs bshad gsar pa'i tshong dpon des//
gdul bya'i blo yi dbul ba ma lus bsal//
dad pa'i zong can brtson 'grus kha lo pa//
yud kyis mkhas pa'i grangs su chud par gyur//
de tshe shes bya'i dkor nor dpag yas kyis//
mi shes dbul ba'i ming yang sgrog ma gyur//
rin chen gling son nor bu'i bang mdzod ltar//
bslab gsum rgyan phreng nor bu'i do shal la//
lta 'dod blo gsal mdzangs pa'i mgul pa'i khar//
gang la ci 'dod legs byas stsol bar mdzad//
ces paNDi ta chen po shAkya mchog ldan dri med legs pa'i blo gros kyi rnam par thar pa zhib mo rnam par 'byed pa las/ mkhas pa mkhas pa'i grangs su bgrangs pa'i skabs las bsgrags pa'i rab tu byed pa drug pa'o//
Chapter 7: rig pa'i gnas la sbyangs tshul bstan pa'i skabs
der dgung lo bco brgyad kyi dus de nyid du bka' las g.yag TIka 'di mkhas pa chen po dpal ldan bzang po bas ched gnyer gyi phyag khrid stsal ba yin pas/ 'di la da res 'chad