[A:33]ཕ་རོལ་ཏུ་སོན་པའི་གོ་འཕང་མཆོག་བརྙེས་ཏེ། དགུང་ལོ་བཅོ་བརྒྱད་དུ་ཕེབས་པ་ཤིང་མོ་གླང་གི་ལོ་ནས་ཟུར་འཆད་ཀྱི་མིང་བཞག་གི་འཆད་ཉན་ཡར་ངོའི་ཚེས་ཀྱི་འཕེལ་བ་ལ་འགྲན་པར་བཟོད་པའི་རྣམ་དཀར་གྱི་ཕྲིན་ལས་སྤེལ་བའི་གསུང་གི་བདུད་རྩིའི་བགོ་སྐལ་ཐོག་མར་བཞེས་པ་ཡང། གུར་ན་རབ་འབྱམས་ཕྱོགས་ལས་རྣམ་པར་རྒྱལ་བའི་ལྷ་ཞེས་པས་མཚོན་པ་དག་ཅིག་ལ། གང་སྔོན་ཆད་སུ་གང་དག་གི་རྣ་བའི་ཡུལ་དུ་མ་འོངས་པའི་ལེགས་པར་བཤད་པ་གསར་པ་དག་ཅིག་གིས་མགྲོན་དུ་མཛད་མཛད་པ་ན། གདུལ་བྱ་མ་ལུས་པའི་ཡིད་དབང་ལྷག་པར་གསོས་ཏེ་གསུང་གི་བདུད་རྩིའི་བཏུང་བས་རང་རང་གི་སྐལ་བ་ཇི་ལྟའི་དབང་པོ་ཚིམ་པ་ཉེ་བར་ཐོབ་ཅེས་ཕྱོགས་བཅུར་གྲགས་པའི་གཏམ་དག་གོ༎
ཕྱོགས་སུ་མ་ཆད་བདེ་བའི་དབུས་ཤིག་ན༎
ཆོས་སྨྲའི་དགའ་ཚལ་ཕྱོགས་བཅུའི་མགོན་པོའི་ཁྱིམ༎
སྔོན་མེད་ལེགས་བཤད་གསར་པའི་ཚོང་དཔོན་དེས༎
གདུལ་བྱའི་བློ་ཡི་དབུལ་བ་མ་ལུས་བསལ༎
དད་པའི་ཟོང་ཅན་བརྩོན་འགྲུས་ཁ་ལོ་པ༎
ཡུད་ཀྱིས་མཁས་པའི་གྲངས་སུ་ཆུད་པར་གྱུར༎
དེ་ཚེ་ཤེས་བྱའི་དཀོར་ནོར་དཔག་ཡས་ཀྱིས༎
མི་ཤེས་དབུལ་བའི་མིང་ཡང་སྒྲོག་མ་གྱུར༎
རིན་ཆེན་གླིང་སོན་ནོར་བུའི་བང་མཛོད་ལྟར༎
བསླབ་གསུམ་རྒྱན་ཕྲེང་ནོར་བུའི་དོ་ཤལ་ལ༎
ལྟ་འདོད་བློ་གསལ་མཛངས་པའི་མགུལ་པའི་ཁར༎
གང་ལ་ཅི་འདོད་ལེགས་བྱས་སྩོལ་བར་མཛད༎
ཅེས་པཎྜི་ཏ་ཆེན་པོ་ཤཱཀྱ་མཆོག་ལྡན་དྲི་མེད་ལེགས་པའི་བློ་གྲོས་ཀྱི་རྣམ་པར་ཐར་པ་ཞིབ་མོ་རྣམ་པར་འབྱེད་པ་ལས། མཁས་པ་མཁས་པའི་གྲངས་སུ་བགྲངས་པའི་སྐབས་ལས་བསྒྲགས་པའི་རབ་ཏུ་བྱེད་པ་དྲུག་པའོ༎
Chapter 7: rig pa'i gnas la sbyangs tshul bstan pa'i skabs
དེར་དགུང་ལོ་བཅོ་བརྒྱད་ཀྱི་དུས་དེ་ཉིད་དུ་བཀའ་ལས་གཡག་ཊཱིཀ་འདི་མཁས་པ་ཆེན་པོ་དཔལ་ལྡན་བཟང་པོ་བས་ཆེད་གཉེར་གྱི་ཕྱག་ཁྲིད་སྩལ་བ་ཡིན་པས། འདི་ལ་ད་རེས་འཆད་