[A:227]thag byed thal ngag dbang po'i rdo rje 'bar//
byams pa'i chos lnga'i nges don rab gsal byams chos lam gyi bang rim las//
nye bar 'dzegs nas brgyud pa'i bsti gnas dga' ldan bgrod pa'i lam sgo phye//
dbu ma'i byung tshul yid bzhin lhun po rtsa 'jug TI ka lta khrid gnyis//
lugs gnyis rnam 'byed dbu ma'i nges gsang gsal bar 'char byed stong mthun gnyis//
gzhan gzhung nor ba grangs su bgrang byas dngos gnas gsal ba sgo brgya pa//
nges don bdud rtsi'i thigs pa mchog de tshangs dbyangs 'khor lo phyogs bcur sgrog/
nyi zla'i shing rtas legs par drangs pa'i bslab gnas 'chad byed rgyas bsdus dag/
gzhi gsum phyag bzhes bdud rtsi'i gsos kyis 'dul ba'i bstan pa'i srog nas bzung//
rnal 'byor spyod gzhung rgya mtsho'i rlabs 'phreng bye brag bshad pa'i rgya mtshor 'khyil//
sdom gsum nges gnas gsal byed sgron mes dpyod ldan mig gi dga' ston spel//
zhes zur gyis mtshan smos pa'i phar phyin theg pa dang rjes 'brel shog bu mda' tshad bzhugs lnga brgya ma'i glegs bam bcu gnyis/ mdo sngags spel ma'i dbus pa gdong 'don pod grangs bzhi/ bstod tshogs chab shog la sa skya gras kyi po ti gnyis te pod grangs bco brgyad po gting skyes chos rje sku mched rnam pa gsum gyis re re phyag bzhengs gnang zhing bdag gir gnang ba ni bka' drin zla med pa'i bstan pa'i khur bsnams par snang zhing/ bdag gis kyang 'bad nas de dag gi lung legs par thob bo//
der dngul gdung gi las ka yang mthar phyin nas sku gdung yid bzhin nor bu dbang gi rgyal po nyid kyang spyan drangs te sngon bkas bcad pa'i dgongs dbyings bzhin du bzhugs su gsol zhing/ chab ser las