[A:223]'o na ci lags zhus pas/ 'od gsal zer ba de yin par snang ngo// ngo shes dgos pa yin gsung zhing/ der gtor shom da lta rang gyis shig gsung ba'i lugs ltar bshams nas rgyas par 'bul ba gnang/ sngags phyag rgya ting nge 'dzin nan sbyor du mdzad rjes/ seng ge'i nyal stabs kyis en tsam gzims pa'i tshul bstan/ de las bzhengs nas bo dong 'tsho byed pas phyag rtsa cig zhus pas/ rtsa de ma bsdus snang ngam gsung ba la/ cher mi rtogs pa 'dug lags zer/ phyag 'bul zhig byas nas gsol ja sang tsam zhig bzhes e spro zhu ba la/ de ka bgyi gsung nas/ gsol ja thon byung dus/ gzims dpon rnam rgyal bas gsol dkar bteg nas zhal hub gang gsol nas de bsdus gsung ste/ sku bsrang phyag gnyis sa gnon mnyam gzhag gnang/ dgongs pa mngon du mdzad de chos kyi dbyings su snyoms par zhugs pa'i de ma thag/ rje kun dga' rgyal mtshan pas nyang stod nas lam bsrangs phebs pas/ drung chen sangs rgyas seng ges nan du spyan drangs/ phyag mdzad sku mdun du bzhugs pas spyan cer gzigs byung/ bka' lung gzhan ni ci yang mi gsung/ der rje kun dga' rgyal mtshan pas kyang/ sku drung du bzhugs nas thugs dam lam dus shig len pa gnang ba yin zhes thos so//
kye ma 'dzam gling sa yi ljongs 'dir ni//
thub pa'i skyes mchog lan gnyis 'da' tshul bstan//
rgya bod gdul bya'i yid bde'i dpal 'phrog pa'i//
brtse ldan khyod las khros pa srid 'dir su//
thub bstan mkha' dbyings gsal ba'i klongs yangs 'dir//
bstan 'dzin rgyu skar 'char nub mang na yang//
yongs rdzogs bstan pa'i nyi zla khyod gshegs nas//
'dzam gling gnam sa ma lus mun pas khyab//
mgon khyod mgon med 'gro 'di yongs dor na//