[A:162]phyar te dgongs lags sam zhus pas shes byung/ nam mkha'i mdog tu snang/ ga re drung nas chos kyi bzang po ba de bzhugs na ang khong de la dges pa mtha' dbus med pa cig 'khrung ba snang bas gsung/ zhes drung yig chos rgyan las brgyud pa'i gsung sgros so//
'di ltar tshul ston pa yang sngon bag ston pa'i dus kyang spyan ya gcig mi gsal zhing/ de'i rgyu mtshan yang bag ston nyid kyi gsung las/ sngon nga rtar skyes dus rta rogs la phra ba brgyab pas mig snang ba'i las kyi mtha' yin gsung ba ltar dang/ sngar tshe bsgrub gnang ngo cog la drug cu re gcig gnyis dog pa'i lung bstan gyi dbang las yin par snang/ der spyan gsal gyi zhal dkar rgya cher 'bul mi byung zhing/ sngar las gsal ba'i tshul gyis phyag dpe'i mtshan phra mo'i yi ge yang bde blag tu gzigs tshul gnang/ de nas vc: 1490khyi lo'i dpyid mtshams la rin spungs su spyan drangs nas/ sde bdag sku mched rnams kyis dbang dang byin rlabs dpag med gsan zhing/ rong dang shangs sogs nas dad 'dus kyi dge bsnyen dge tshul dge slong zhu mi mang ba dang/ sems bskyed dbu sems gnyis ka yang zhu mi'i ngor stsal/ kye rdo rje ras bris la brten pa'i dbang cha gsum tsam rnams gnang zhing/ skal bzang dam tshig can de dag gis zhus pa'i ngor/
khyod bla ma mchog gi sprul sku//
nga rang lus rtsa yi 'khor lo//
chos bum pa'i dbang bskur stsal bas//
don bskyed rim lha yi dkyil 'khor//
dus de ring 'gag med du shar ro//
skabs 'dir yang bka' drin che'o//
zhes sogs kyi gsung mgur yang gnang zhing/ der bu ram bsgar ma rang yang drel khal gnyis kyi sku 'khyos dang bcas nas slar gser mdog can du phebs/ mang ja bur 'gyed sogs kyis grwa pa rnams yid tshim pa'i bka' drin stsal to//