[A:163]མ་ཕམ་ཞལ་གྱི་དཀྱིལ་འཁོར་མདངས་གསལ་བ༎
བརྒྱུད་པར་བཅས་པའི་སྤྱན་ཡངས་ལ་འཁྱུད་དེ༎
བྱམས་ཆོས་ལུས་སྒྲུབ་གཟུགས་བརྙན་གསལ་བའི་ཚིག༎
དིང་འདིར་སྔོན་མེད་ལེགས་བཤད་རྒྱ་ཆེར་སྤེལ༎
བྱམས་སྐུའི་རི་བོ་རིན་ཆེན་ལས་བསྒྲུབས་པ༎
གསེར་མདོག་གཟི་འོད་འཕྲོ་བའི་དཔལ་གང་ནི༎
དཀའ་བ་མེད་པར་དགའ་ལྡན་ལྷ་གནས་ནས༎
ངང་གིས་བྱོན་ཏེ་གནས་འདིར་བཞུགས་པ་བཞིན༎
བྱམས་མགོན་གཉིས་པ་དོན་ཡོད་དཔལ་བཟང་པོའི༎
སྐུ་གདུང་ཁ་བའི་འོད་ཆགས་དུམ་བུ་དག༎
རིན་ཆེན་དར་གོས་ཀྱིས་ཀླུབས་ཆོས་སྐུའི་རྟེན༎
བྱེ་བ་ཕྲག་བརྒྱར་སྤེལ་ནས་དེ་ནང་བཞུགས༎
ལྷ་གནས་ཡིད་འཕྲོག་བྱམས་པའི་གཙུག་ལག་ཁང༎
མི་དང་མི་མིན་དད་པའི་འཕྲུལ་ལས་བསྒྲུབས༎
ལྷ་བཅས་འགྲོ་བའི་ཕྱག་དང་མཆོད་པའི་ཞིང༎
ངོ་མཚར་དཔག་ཡས་ཐུགས་རྗེའི་དཔལ་གྱིས་བསྐྲུན༎
རྒྱ་གར་ཡུལ་ནས་ཉན་ཐོས་དགེ་སློང་གང༎
སློང་བའི་སྣོད་དུ་བྱང་ཆུབ་ཤིང་ལོའི་ཚོགས༎
མ་སྦགས་གཙང་སྦྲའི་བཀུར་སྟིས་སྤྱན་དྲངས་ཏེ༎
བྱམས་པའི་སྐུ་ལ་ཆེད་དུ་འབུལ་བར་མཛད༎
བྱམས་པའི་རང་བཞིན་གཡག་རོང་ཨ་མོ་གྷ༎
བྱམས་པས་རྗེས་སྤྲུལ་པཎ་ཆེན་ཆོས་ཀྱི་རྗེ༎
བྱམས་ཆོས་བསྟན་པའི་བདག་པོ་བརྒྱུད་པར་བཅས༎
བྱམས་པའི་ཐུགས་ཀྱིས་འགྲོ་བའི་སྐྱབས་མགོན་གྱུར༎
ཅེས་པཎྜི་ཏ་ཆེན་པོ་ཤཱཀྱ་མཆོག་ལྡན་དྲི་མེད་ལེགས་པའི་བློ་གྲོས་ཀྱི་རྣམ་པར་ཐར་པ་ཞིབ་མོ་རྣམ་པར་འབྱེད་པ་ལས། བྱམས་པའི་སྐུའི་སྣང་བརྙན་རྗེས་སུ་བསྒྲུབས་པའི་སྐབས་ལས་བསྒྲགས་པའི་རབ་ཏུ་བྱེད་པ་བཅུ་དགུ་པའོ༎ ་༎
Chapter 20: bsngags par 'os pa'i cha shas 'ga' zhig
དེར་པཎ་ཆེན་རིན་པོ་ཆེ་སློབ་མའི་ཚོགས་ཀྱི་ཞབས་འབྲིངས་དང་བཅས་པས་སྟག་གྲུ་ཁ་ནས་འུ་ཡུག་ལ་གནང། དེ་ནས་སྟག་པའི་རུ་བ་སོགས་ལ་བརྒྱུད་