[A:318]gting nas gdan sa de nyid du lo bcu bzhi'i bar du phrin las nye bar bskyangs so//
de yang gsang phur bzhugs la gling stod dang/ grwa tshang slob dpon rkong po'i grwa tshang de nyid yin kyang/ rje nyid kyis grwa tshang ris su bcad pa'i 'chad nyan ma mdzad cing/ gling stod smad mtha' dag nas slob ma phyogs med du 'du zhing/ kun gyis rtsod pa med par 'thun snang du grub pa ni dang po bshad nyan mdzad pa'i dus nyin nas yin la/ phyis dgung lo drug cu bzhes pa tsam gyi tshe na ni/ gdan sa pa dang/ zur chen dang 'chad nyan pa thams cad rje nyid kyi slob mar gyur pa shas stag yin pas/ gdan sa chen po der slob dpon phya pa 'das pa'i 'og tu kun gyi 'thun snang du grub pa'i slob dpon ni/ rje btsun dam pa 'di gcig pu kho nar nges so//
de'i rgyu mtshan gyis nA lantra'i dgon pa btab pa na gsang phu'i las tshan dang/ mi sna thams cad 'dus shing ma tshang ba med kyi steng du/ de la med pa'i grwa rgyun gyi khyad par mang po dag dang bcas te/ dgon pa btab ma thag tu dge 'dun stong phrag phyed dang gnyis tsam tshogs par gyur te/ bshad nyan gyi sgrigs dang/ rnam pa bzhag pa thams cad sa rngog gnyis ka'i lugs dang 'thun par mdzad do//
yang rje nyid kyi dgung lo lnga bcu tsam bzhes pa'i tshe/ snye thang 'or du jo 'o chen po rje lha gcig gi gdan sa'i ming 'dogs dang/ bde ba can gyi chos grwa'i zur chen lo gsum mdzad par grags so//
gang du gang gis ring du gnas gyur na//
rang nyid rang du rlom pas khengs 'gyur zhing//
gzhan dag gzhan la phrag dog gis gdung ba'i//
gnas der gnas pa min zhes khyod kyis gsungs//
rjes 'jug rjes 'brangs yongs kyang de la 'dun//
'dun pas tshul de tshul