[A:318]གཏིང་ནས་གདན་ས་དེ་ཉིད་དུ་ལོ་བཅུ་བཞིའི་བར་དུ་ཕྲིན་ལས་ཉེ་བར་བསྐྱངས་སོ༎
དེ་ཡང་གསང་ཕུར་བཞུགས་ལ་གླིང་སྟོད་དང། གྲྭ་ཚང་སློབ་དཔོན་རྐོང་པོའི་གྲྭ་ཚང་དེ་ཉིད་ཡིན་ཀྱང། རྗེ་ཉིད་ཀྱིས་གྲྭ་ཚང་རིས་སུ་བཅད་པའི་འཆད་ཉན་མ་མཛད་ཅིང། གླིང་སྟོད་སྨད་མཐའ་དག་ནས་སློབ་མ་ཕྱོགས་མེད་དུ་འདུ་ཞིང། ཀུན་གྱིས་རྩོད་པ་མེད་པར་འཐུན་སྣང་དུ་གྲུབ་པ་ནི་དང་པོ་བཤད་ཉན་མཛད་པའི་དུས་ཉིན་ནས་ཡིན་ལ། ཕྱིས་དགུང་ལོ་དྲུག་ཅུ་བཞེས་པ་ཙམ་གྱི་ཚེ་ན་ནི། གདན་ས་པ་དང། ཟུར་ཆེན་དང་འཆད་ཉན་པ་ཐམས་ཅད་རྗེ་ཉིད་ཀྱི་སློབ་མར་གྱུར་པ་ཤས་སྟག་ཡིན་པས། གདན་ས་ཆེན་པོ་དེར་སློབ་དཔོན་ཕྱ་པ་འདས་པའི་འོག་ཏུ་ཀུན་གྱི་འཐུན་སྣང་དུ་གྲུབ་པའི་སློབ་དཔོན་ནི། རྗེ་བཙུན་དམ་པ་འདི་གཅིག་པུ་ཁོ་ནར་ངེས་སོ༎
དེའི་རྒྱུ་མཚན་གྱིས་ནཱ་ལནྟྲའི་དགོན་པ་བཏབ་པ་ན་གསང་ཕུའི་ལས་ཚན་དང། མི་སྣ་ཐམས་ཅད་འདུས་ཤིང་མ་ཚང་བ་མེད་ཀྱི་སྟེང་དུ། དེ་ལ་མེད་པའི་གྲྭ་རྒྱུན་གྱི་ཁྱད་པར་མང་པོ་དག་དང་བཅས་ཏེ། དགོན་པ་བཏབ་མ་ཐག་ཏུ་དགེ་འདུན་སྟོང་ཕྲག་ཕྱེད་དང་གཉིས་ཙམ་ཚོགས་པར་གྱུར་ཏེ། བཤད་ཉན་གྱི་སྒྲིགས་དང། རྣམ་པ་བཞག་པ་ཐམས་ཅད་ས་རྔོག་གཉིས་ཀའི་ལུགས་དང་འཐུན་པར་མཛད་དོ༎
ཡང་རྗེ་ཉིད་ཀྱི་དགུང་ལོ་ལྔ་བཅུ་ཙམ་བཞེས་པའི་ཚེ། སྙེ་ཐང་འོར་དུ་ཇོ་འོ་ཆེན་པོ་རྗེ་ལྷ་གཅིག་གི་གདན་སའི་མིང་འདོགས་དང། བདེ་བ་ཅན་གྱི་ཆོས་གྲྭའི་ཟུར་ཆེན་ལོ་གསུམ་མཛད་པར་གྲགས་སོ༎
གང་དུ་གང་གིས་རིང་དུ་གནས་གྱུར་ན༎
རང་ཉིད་རང་དུ་རློམ་པས་ཁེངས་འགྱུར་ཞིང༎
གཞན་དག་གཞན་ལ་ཕྲག་དོག་གིས་གདུང་བའི༎
གནས་དེར་གནས་པ་མིན་ཞེས་ཁྱོད་ཀྱིས་གསུངས༎
རྗེས་འཇུག་རྗེས་འབྲངས་ཡོངས་ཀྱང་དེ་ལ་འདུན༎
འདུན་པས་ཚུལ་དེ་ཚུལ་