[A:527]rtsa lngar gral dpon mdzad de 'khor thams cad skyong zhing bzhugs pa yin no/ /rje btsun gtsang pa ni/ las stod cung pa'i smad kyi sum pa nye'u mkhar zhes bya ba na/ yab sum pa dbang phyug ces bya ba dang / yum rma mo khye mkhar zhes bya ba'i sras lnga'i che dag tu 'khrungs/ khyim thab byed khar g.yu rdog khyer nas myang stod stag tshal du stod lung pa rgya dmar ba dang / rog mngon pa gnyis kyi grwa sar byon nas rab tu byung ste lo gcig bzhugs/ de nas rje ras chung ba'i spyan sngar byon pas shin tu mos par gyur nas/ phyag g.yas pa'i srin lag bcad de mar me byas nas phul/ dgung lo nyi shu rtsa gcig gnyis la mjal nas gzims g.yog mdzad de/ zhal mjal tshad la mthong phyag gsum gsum mdzad pa dang / zhag re la phyag brgya brgya mdzad par dam bcas te bzhugs/ dang po nas yab yum gnyis rje btsun gyi yon bdag tu gyur pa dang / thag rings su chos la byon pas/ khong gis nye gnas mdzad phan chad khong med pa'i chos dang gdams ngag thun cig kyang gsungs pa med skad/ ras chung pa gshegs rjes gdan sa gzung / de'i dus na chu bo ganggA tshun la bzang bar grags/ gdams ngag ni rgya bod gnyis ka na che/ thugs rjes ni sems can thams cad rjes su 'dzin pa zhig bzhugs/ yang sde snod 'dzin pa nas ma de bud med dang byis pa yan chod mi dad pa dang skur ba 'debs pa ni gcig kyang med/ khong gi mdzad spyod sna re mthong bas sems la phan zhing / slob dpon gzhan la chos dang